No.755/2021-2022


Dated Champhai, the 31st May, 2021: Vawiin khan District Disaster Management Authority (DDMA), Champhai District chu DC Conference Hall-ah thukhawmin, May ni 31 zing dar 4 atanga June ni 7, 2021 zing dar 4 thlenga lockdown kalpui tur chungchang an Chairman Pi Maria C.T Zuali, District Bawrhsap kaihhruaiin an rel a ni.

Thutkhawmah hian Champhai District chhunga hrileng dona kawnga hmalakna hrang hrangte chu tha thawkhat viau a hriat a nih thu tarlan niin, ramri kaltlanga hri inkaidarh thei laka fimkhur a tul ziate sawiho niin, hmalak theih dan turte ngaihtuahho a ni a. District level a thurelte a taka kalpui a nih theihna tura mimal tinte an pawimawh thu leh lungrual taka thawhho a tul thute he hunah hian tarlan a ni bawk.

Meeting chuan tun dinhmunah Champhai District boruak a ziaawm rih avangin District pawn atanga lo lut turte uluk taka vilzuia inkaihhruaina dante tha taka kenkawh zel nise a ti a. Inkaihhruaina thar hman leh tura bazar leh dawr hawn hun chungchangte, hnathawh chungchangte ngun taka ngaihtuahho a nih hnuah District mila ruahmanna tharte hetiang hian duan a ni a. Hei hi Mizoram sawrkarin inkaihhruaina thar a tihchhuah bakah District tana him leh tha tur inkaihhruai nan hman tur a ni ang.

I. Dawr inhawn dan tur/Chawhmeh zawrh chungchang:

Mipuiin kan mamawh zualpui kan lam khawm theih nan leh tawt lutuka kan bazar loh nan a hnuaia mi ang hian dawr hawn hun leh dawr hawn theih te ruahmanna siam a ni.
a) 1) Insakna/ Mistiri bungrua, Agriculture leh Ran chaw zawrhna: Thawhtanni & Ningani, 6:00-10:00 AM

2) Eichawp, Thlai, Chawhmeh, Sa, Stationery / Zirlai bu zawrhna: Thawhlehni & Zirtawpni, 6:00-10:00 AM

3) A chunga sawi bak thil zawrhna dawr dangte: Nilaini & Inrinni, 6:00-10:00 AM

b) Thawhtanni leh Ningani zing dar 5:00 atanga zing dar 9:00 inkarah distributor/wholesaler ten retailer (zuar chhawng turte) hnenah an bungrua an sem thei ang. Retailer-te hian an veng VLTF-te remtihna an lo nei vek tur a ni.

c) Dawr neitu zawng zawng ten anmahni dawrtute chu sulhnu mobile app emaw, register emaw hmangin an chhinchhiah ngei ngei tur a ni a. Anmahni dawrtute nen inhnaihchilh lovin hrui an thlung tur a ni.

d) Bazara chhuak turte reng rengin VLTF lehkha/Permit an nei ngei ngei tur a ni. Permit nei lova chhuakte chu pawisa chawitir/hawtir tur a ni.

e) Champhai khawpui pawn lam atanga Champhaia bazar turte chuan dawr hawn hun chhunga bazar hman turin ruahmanna an insiam tur a ni.

f) Courier service, E-Commerce leh Home Delivery - Heng hian State pawn leh State chhunga bungrua, online emaw phone emaw hmanga order lawk sa pek (Home Delivery) leh e-Commerce/home delivery kaihhnawih hna tul thawk tura an inhawn phalsak an ni a. Tin, CAB tha taka zawm chungin bungrua semtute chuan inchhunga lut lovin an thil semte chu an pe tur a ni.

II.Hmasawnna hnathawh chungchang:
a) Mahni in leh compound chhungah hnathawktu ruaiin hna thawh phal a ni. Hmun dang/veng dang atanga hnathawk (Mistiri/Labour) ruai tur chuan hnathawktu awmna veng VLTF remtihna bakah hnathawhna tur hmun veng VLTF-te remtihna an la tel hmasa vek tur a ni.
b) Hmun khatah mi panga (5) aia tamin hna thawh loh tur a ni.
c) Mi panga (5) aia tam hna thawh tulna, chhiatrupna thleng palh thei chi hna thawh ngai hmanhmawh thlak a awm a nih chuan DC leh a aiawh ten a hmunah enfiahin, a tul an tih chuan hnathawh phalna an pe ang.
d) Leilet, huan, sangha dil, adt.-a lehlanga thawk turte chu zing dar 9:00 ah an chhuak hman vek tur a ni a, zan curfew (dar 7:00) hma-in an let leh hman tur a ni. VLTF ten an kalna hmun tur leh permit pek chhan te, hnathawk tur zat te chiang takin permit-ah an ziak tur a ni.

e) Leilet, huan, sangha dila hnathawk turte hian duty-te enfiah theih turin leilet/huan/dil an nei ngei a ni tih finfiah theihna document (LSC, Periodic Patta, VC Pass, VC hriatpuina lehkha) an keng tel ngei tur a ni.

f) MGNREGA, MP-LADS, MLA-LADS hnuaia hnate chu thawh phal a ni. Hnathawktu ten inhnaih lovin, CAB inkaihhruaina uluk taka zawmin hna an thawk tur a ni thung ang.

III.Zin veivah chungchang:
1) Mahni khua chhuahsana zin veivah khap tlat a ni. Amaherawhchu, chhiat tawh leh damlohna (Medical Emergency) avanga mahni khua chhuahsana zin veivah a tul chuan mahni awmna veng/khua VLTF te hriatpuina lehkha nen zin veivah theih a ni ang.

2) Heng bakah hian loh theih loh thila zin tulnaah chuan Deputy Commissioner/SDO/BDO ten phalna an pe thei ang.

3) Inter-district zin phalna chu https://mcovid19.mizoram.gov.in/pages/ mpass/inter-district emaw, mCOVID-19 mobile app emawah dil theih a ni.

IV.Sawrkar Office:
1) District Headquarters chhunga sawrkar Office-te chu Head of Office ten hna pawimawh bik leh tul zual thawk tur chin chauh hminghmerhin an ruat ang. Office kal tura ruatte chuan Detailment Order chu Police/Executive Duty/VLTF te enfiah theih turin an keng tur a ni. Chutiang ni lo, Department hming motor-a bel vang emaw, ID neih vang ringawtin emaw an vei vak tur a ni lo. Chutiang an awm a nih chuan duty ten action lak tur a ni a; Department Head theuhte pawhin mahni staff-te chiang taka hriattir tur a ni.

2) Head of Office ten office kal tura an ruat ni lote chu Covid-19 Executive Duty tura ruat chhunzawm theih an ni ang.

3) Executive Duty tur hian DC Office, Health & Family Welfare Department, Bank, Home (Police, F&ES, Home Guards, Prisons), Vety Hospital, Treasury, I&PR leh Excise Department-a thawk staff-te chu ruat loh tur an ni.

V. Bungraw chawkluh leh thiar chungchang:
1) Bungraw phur lut tur lirtheite chuan Curfew intan hma, zan dar 7:00 pelh hma-in Khankawn Police Checkgate an paltlang hman tur a ni a, zan dar 7:00-a Khankawn Checkgate thleng hman lote chuan khaw daiah an nghah a ngai ang. Zan dar 7:00-a Khankawn Checkgate pel hmante chu zan dar 6:00 atanga zan dar 10:00 thleng an bungrua thiar/hlan thlak phalsak an ni ang. Bungrua an hlan thlak zawh veleh tawi khawmuang lovin an haw leh nghal tur a ni.
2) Bungraw neitu/chahtu te hian an bungrua a lo thlen hmain an bungraw chah chungchang VLTF-te hnenah an lo hriattir lawk tur a ni a, bungraw thiar tur (Mutia) veng dang atanga chhawr a ngai a nih pawhin an awmna veng VLTF hriatpuina an lo la lawk vek tur a ni.

Vawiin chawhma khan Champhai Importers-Exporters Syndicate (CIES) chuan an pawl hmingin Covid-19 dona kawnga a tul leh mamawh apianga hman turin tanpuina sumfai Rs 3,00,000/- (nuaithum) District Disaster Management Authority (DDMA), Champhai District hnenah an hlan a ni.

Covid-19 No Tolerance, October ni 26, 2020 atanga hman tan, chhunzawm mek zelah nimin 30.05.2021 thleng khan Champhaia dan bawhchhia man tawh zat chu mi 2,009 niin, pawisa chawi tlingkhawm tawh zat chu avaiin Rs  3,45,700/- a tling tawh a. Dan lova ramri kana kal/zin  4 leh inkhung hrang tura tih zawmlo hrem 1 awm tawhin, hremna pawisa chawitir tlingkhawm zat chu  Rs 21,000/- a ni.


Attachment

  • Loading attachment...