327/2024-2025 

2024 Ṭau thla ni 20: Nimin, April ni 19, 2024 (Zirtawpni)-a 1-Mizoram Parliamentary Constituency-a Lok Sabha seat 1 atana inthlan vote thlak zawh tak chungchangah Lawngtlai District Election Officer Pu Cheemala Siva Gopal Reddy chuan vawiin chawhnu khan a office chamber-ah thu thar theh darhtute a kawm.

Lawngtlai DEO Pu Cheemala Siva Gopal Reddy chuan Lawngtlai District chhunga polling station 181-ahte inthlan hlawhtling leh muanawm tak buatsaih a nih thu te, venhimna kaihhnawiha harsatna emaw, vote thlak ṭhat ngai emaw a awm loh thu te, Lawngtlai District-ah vote 36.63% tla a, vote tlak ṭhatna ber district a nih thu te sawiin, District mipuite chu lawmpuina a hlan a. Felfai leh hlawhtling taka inthlan buatsaih zawh a ni chu official zawng zawngte, political party, tlawmngai pawl, kohhran, zirlaite leh mipuite thawhpuina bakah, media te ṭawiawmna ṭha tak vang a ni tiin, lawm thu a sawi a. Lok Sabha Inthlanpui 2024-a Lawngtlai District chhunga vote tlak dan dinhmun tlangpui a tar lang bawk.

He hunah hian DEO hi Deputy DEO Pi B. Malsawmtluangi, Election Officer Pu Denny Lalchhuanawma leh official dangte'n an ṭawiawm a. President Pu Elvis Lalthangzuala hovin Lawngtlai District MJA member eng emaw zat telin, zawhna leh chhanna leh sawi hona hun hman a ni bawk.

He huna tar lan a nih danin, 36-Tuichawng assembly bial aṭangin EVM-ah vote 26,463 (mipa 14,366 leh hmeichhia 12,097) tlain, 72.48% vote tla ang a ni a. 37-Lawngtlai West bial aṭangin EVM-ah vote 19,217 (mipa 9,891 leh hmeichhia 9,326) tlain, 64.51% vote tla ang a ni a. 38-Lawngtlai East bial aṭangin EVM-ah vote 12,907 (mipa 6,468 leh hmeichhia 6,439) tlain, vote 49.35% tla ang a ni a. Lawngtlai District pumah EVM-ah vote 58,587 (mipa 30,725 leh hmeichhia 27,862) a tla a, chu chu vote awm zawng zawng 92,455 aṭangin 63.368% a ni.

Lawngtlai District chhunga polling station 181 awmah 37/32-Sekulhkaiah vote 88 awmah vote 86 (97.73%) tlain, vote tlak ṭhatna ber polling station a ni a. 38/5-Lawngtlai Bazar North-a vote 839 awmah vote 317 (37.78%) tlain, vote tlak chhiatna ber a ni thung. A zat chhiara vote tla tam berna chu vote 760 tlakna 36/17-Kamalanagar-IV polling station niin, vote 30 tlakna 37/34-Hlimzawl polling station chu vote tla zat tlem berna polling station a ni thung.

Tun ṭum Lok Sabha Inthlanpui atan hian Lawngtlai District-ah a pum puiah Election Duty Certificate (EDC) 1,336 pek chhuah niin, 261 chu Lawngtlai District pawna vote nei an ni a. Lawngtlai District chhunga vote nei 1,075 EDC pek chhuah zingah Tuichawng bial mi 305, Lawngtlai West bial mi 333 leh Lawngtlai East bial mi 437 an awm.

Lawngtlai District-ah hian kum upa (85+), vohbik (PwD) leh hna pawimawh bik thawk (essential service), vote thlak ni hmaa vote lo thlak lawktir mi 153 an awm a. Kum 85 chung lam 128, PwD 3 leh essential service 22 an ni.