Vawiin khan Krishi Vigyan Kendra(KVK), College of Veterinary Sciences & Animal Husbandry (CVsc&AH) Selesih ah ran natna enkawlna tur scheme thar National Animal Disease Control  Programme for Foot and Mouth Disease & Brucellosis leh Ran Kah raina AI (Artificial Insemination) Programme, Prime Minister in tunhnaia a tlangzarh chu  Mizorama a bultanna tur hawnna programme hman a ni a. he hun hi Lok Sabha MP Pu C. Lalrosanga’n a hmanpui a ni.

Lok Sabha MP Pu.C.Lalrosanga chuan Prime Minister in hetiang programme lian tham tak mai  India ram pum huap a, a hawng thei chu lawmawm a tih thu sawiin ram pum tan he programme hnuaia cheng vaibelchhe 13,434  ruahman anih thu a sawi lang a. Mizoram ran vulhtu te pawh in he scheme thar hi an chhawr tangkai ngei a beisei thu sawiin ran vulhte, ran vulh, natna lakah an fihlim chuan ran vulhtu te tan hmasawnna nasa tak a thlen a beisei thu a. Mizo te ran vulh kawngah kan la intodelh lo hle a, a bik in bawnghnute atanga siam chhuahah phei chuan kan la intodelh lo nasa hle a, intodelh tur a tan kan lak zel a pawimawh a. Kan ramah hian hmun ruak a la tam a, sorkar leh kut hnathawktu ten tih tak zet a kan beih chuan kan ram atang hian hmun dang a thawn chhuah tham kan thar thei a ni. Ran vulhtuten tun aia nasa in kan ran vulhna hmun tihfai kawngah leh kan ran vulh ngei te pawh fai tak a enkawl tum zel ila, chu chuan kan ran vulh te natna leh hri lo thleng lakah pawh a veng thei dawn a ni tiin a sawi bawk.

He hunah hian Professor Lalnuntluangi Hmar Dean Cvsc&AH Selesih chuan kal khawm te lawmna thu a sawi a, Dr.K.P.Chaudhary Senior Scientist & Head KVK chuan lawmthu sawi na  hun a hmang a. Hemi zawh hian Technical session hman zui niin ran vulhtu te mithiam ten zirtirna an pe  a. Chawhnu lamah he scheme thar pual hian Sihphir ah FMD Vaccination Programme leh kah raina hman zui a ni. Programme hi ran vulhtu 100 bawr velin an chhim a ni.