Vawiin chawhma dar 11:00 khan Serchhip CMO Conference Hall ah, ‘Vaihhlo leh Chuap hriselna’ tih thupuia hmangin Mizoram State Anti-Tobacco Day Vawi 6-na chu Pi Sangchhin Chinzah, District bawrhsap leh District Anti Tobbacco Committee Chairman ni bawk hova hman a ni.

Khuallian, District Bawrhsap chuan taksa tana thalo thil lakah mahni inthunun a pawimawh hle a, vaihhlo leh a kaihhnawih that lohzia zirtirna dawng thin tunlai mite an nihlawh hle, a ti. Zirlai naupang te phei chu vaihlo leh a kaihhnawih lakah an inthiarfihlim ngei tur a ni a. Tehna hrang hranga teha vaihhlo leh a kaihhnawih that lohna inzirtir tha (Tobbacco Free Educational Institution) School 4 te hnenah chawimawina thuziak a hlan nghal a ni.

Dr. Lalhlunpuii, District Nodal Officer, NTCP Serchhip chuan Mizoram State Anti-Tobacco Day Vawi 6-na thupui ‘Vaihhlo leh Chuap hriselna’ hmangin vaihhlo leh a kaihhnawihin hriselna a khawih chhiat dan te, nu in a naupai laia hetiang a tih avanga chhiatna a thlen dan te leh puipunna hmun a meizuk avanga harsatna thlen dan hrang hrang te a lem nena entirin kal khawmte a zirtir a ni. 

Pi K. Hmingthansangi, District Consultant, NTCP Serchhip pawhin, kum 2018-2019 leh kum 2019-2020 chhunga National Tobacco Control Programme (NTCP) Serchhip hmalakna report a pe a, vaihhlo leh a kaihhnawih bansan duh mi 400 chuang Cessation Clinic ah enkawl an nih thu te, vaihlo leh a kaihhnawih thatlohzia zirtirna hun Tobbacco Awareness Programme zirna in 127 ah leh kohhran leh tlawmngai pawl hrang hrangte hnenah vawi 45 an neih a nih thu te. Serchhip Anti Tobbacco Squad ten Squad Drive Vawi 100 chuang nei thu te, dan phal lohna hmuna mei zu mi 199 man an nih thu te, chung mite pawisa chawi tlingkhawm chu Rs. 11,020 a tlin thu te a sawi a. Heng bakah hian Cigarettes & Other Tobacco Product Act (COPTA) leh Packaging of Commodities Act in a phal loh  dapchhuah hna Joint Operation vawi tam tak an neih thu leh dan bawhchhia thahnem tak an man tawh thu a tar lang a ni.

He hun hi Dr. Laldawngliana Sailo, CMO Serchhip district chuan a kaihruai a ni.


Attachment

  • Loading attachment...