Press Information Bureau (PIB) bultumin Sawrkar Laipuiin thingtlang hmasawnna tur leh mirethei te dawm kanna tur atana ruahmanna a siam chi hrang hrang mipuite a hrilhhriatna, Public Information Campaign (PIC) nithum awh tur chu vawiin khan Lok Sabha MP PuCL Ruala'n Model Village a siam tura a thlan Serchhip District-a Khawlailung khua ah neih tan a ni a, chawhma dar 11:00 khan Khawlailung I.B. Tlangah Public Information Campaign hawnna inkhawm neih niin khuallian atan Pu CL Ruala, Lok Sabha MP hman a ni.

Khuallian hian PIC gate ah ribbon chep chat a Public Information Campaign a hawn hnu ah Khawlailung mipui kalkhawm hmaah hawnna thu sawiin Pu CL Ruala chuan Press Information Bureau (PIB), I&PR Department, Project Director, DRDA, Serchhip District, East Lungdar BDO leh Khawlailung mipuite thahnemngaihna zarah India ram pumah Khawlailung khaw hming hian hriat a hlawh hi thil lawmawm tak a ni a ti a, India Prime Minister Pu Narendra Modi-a meuh pawhin radio kaltlanga a thusawiah ama hming mai bakah Khawlailung khua hial a lawmawm zawnga a sawi chhuak chu khawtlang mipuite inlungrualna vang liau liau ani tel bawk a ni tiin thinlung taka a lawm thu a sawi a ni. Pu CL Ruala chuan SAGY Programme kal tlang hian India Hnam Pa "Mahatma Gandhi" duhthusam thin thlen dik tir tum a ni a, khaw fai leh thianghlim, khaw taima, ei leh bara intodelhzirna lamah pawh sikul tha leh belhtlak awmna, khawtual mipui pawh hawihhawm leh vengva tak, hriselna kawngah pawh entawntlak khua ni tura beisei an ni a ti a, Village Council ten faina kawnga hma an lak dan fakawm a tih thu sawiin an enkawltur bawlhhlawh paih motor thar pek thuai an nih dawn thu a sawi bawk.

Pu CL Ruala chuan ramngaw humhalh a pawimawh zia sawiin model village ni tur chuan forest reserve tha leh kangmeiin an khua a kan kai lohna tura venghimtu safety reserve tha neih ngei an tum tur ani tiin mipuite a fuih a, Sawrkar hotute leh khawtlang hruaituten an hmasawnna atana thahnemngai taka hma an laksak chu a thlawna luan ral tir lo tura chah in khaw intodelh ni tur chuan kawng hrang hranga hma an lakna ah khawtual mipuite an inlungrual tlan a pawimawh hmasa ber a ni a ti bawk. Khuallian chuan Khawlailung khua tihmingthatu leh rampuma hriat hlawh tirtu "Kurtai Kut" chu ropui lehzuala huaihawt leh ngei anih tur thu a sawi bawk a ni.

PIC hawnna inkhawm hi Pu M.C.Lianmawia, Co-Nodal Officer, PIC in kaihruaiin Pu Mangjangam Touthang, Chairman, Core-Committee, PIC in inlawmna thu leh PIC nihphung sawifiahna hun hmangin Song & Drama Division, I&B Ministry ten Mizo Hnam Lam chi hrang hrang an en tir a, Pu C. Lalsawmliana, Nodal Officer, PIC in lawmthu sawina hun hmangin hnu a khar a ni.

Vawiin PIC hawnna inkhawmah hian SAGY< Khawlailung Charge Officer, Serchhip District DRDA Project Director ni bawk Pi Teresy Vanlalhruaii, MCS bakah official thahnem tak an tel a ni.

PIC hawnna inkhawm neih zawh veleh hian khuallian hian Khawlailung Bazar Shed-a Horticulture Department leh DAVP ten Exhibitiopn an buatsaih chu a tlawh a, hemi hnu hian BNRGSK Hall-a Health & Family Welfare Department in Health Camp an buatsaih te a tlawh nghal bawk a ni.

Chawhnu lamah Session hnih buatsaih niin Sawrkar Laipuiin thingtlang hmasawnna tura ruahmanna a siam chi hrang hrangte inhrilhfiahna hun leh sawihona hun mipuite nen hman a ni a, Session khatna hi Pu Kapliana Pachuau, President, MJA, Serchhip District-in kaihruaiin Health & Family Welfare Department Official ten National Health Mission, Mission Indradanush etc, chungchang zirtirna an pe a, State Bank of India aiawh ten Pradhan Mantri Jan-Dhan Yojana (PMJDY), Pradhan Mantri Jeevan Jyoti Bima Yojana (PMJJBY),Pradhan Mantri Suraksha Bima Yojana (PMSBY),Atal Pension Yojana (APY), etc. chung chang zirtirna an pe bawk.

Session hnihna hi Pu Lalremruata Ralte, Vice- President, MJA, Serchhip District-in kaihruai ve thungin National Horticulture Mission – Horticulture Department, Skill Development – SIDBI, Skill Development – Labour & Employment Department chungchang inzirtir a ni a, Department Official ten an chanpual theuh ah zirtirna an pe bawk.

Public Information Campaign hi Khawlailung ah hian tun kar inrinni thleng hian neih a ni ang a, Khawlailung bakah hian North Mualcheng ah January ni 29, 2016 (Zirtawpni) ah neih niin Piler ah January ni 30, 2016 (Inrinni) hian neih tel a ni bawk ang. Ruahman dan chuan naktuk January ni 29, 2016 a Khawlailung a PIC neihna ah hian Pi Vanlalawmpuii Chawngthu, MLA, Hrangturzo Assembly Constituency, Chairperson, Mizoram Women Commission chu khuallian a ni ang a, Inrinni ah Serchhip District Bawrhsap Dr. Lalrozama, IAS chu khuallian a ni ang.