Directorate of Science & Technology bul tumin vawiin chawhma khan Berawtlang-a Mizoram Science Centre-ah Sensitizaton Workshop on Basic Sciences hlawhtling taka neih a ni a. He hun hi Planning & Programme Implementation Secretary Dr. C. Vanlalramsanga chuan a hmanpui a ni.

He workshop hi zirlai naupangten awlsam leh nuam ti zawka science an zir theih nana science zirtirtute tana buatsaih a ni a. Khuallian Dr. C. Vanlalramsanga chuan hnam hmasawnna atana Science & Technology pawimawh zia sawiin, basic sciences zirtirna uar apiangte hi khawvela ram changkang leh hmasawn chakte an nih thu a sawi a. Nakina ram leh hnam hruaitu tur chherchhuak tute an nih avangin zirtirtute chu he hun hi hmang tangkai lehzual turin duhsakna a hlan nghal a ni.

Workshop kaihruaitu Chief Scientific Officer Dr. R. K. Lallianthanga pawhin  sawrkar hmalakna chak tak avanga kan ramah Science & Technology pawimawhna a lian chho zel chu lawmawm tiin Mizoram hmasawnna hrang hrang atan nasa lehzualin hma an la chho zel dawn a ni, a ti bawk.

Workshop hi Session hnih-ah thenin, a hmasa zawk hi Aizawl District Sub-Divisional Education Officer Pu Laldingliana’n a kaihruaia, Associate Professor Pu Lalhmingliana, Govt. Zirtiri Residential College chu Speaker niin Chemistry zirtirna a pe a. Session hnihna hi Science Consultant, Science Promotion Wing, SCERT Pu F. Lalliansanga’n kaihruaiin, Dr. Zothansiama leh Pu Lalrinthara Pachuau, Assistant Professor-ten Biology leh Physics subject an ziritir a ni.

Aizawl khawchhunga science zirtirtute an kal tha hle a. Workshop-a lokal zawng zawng hnenah Mizoram Science Centre-a Scientific Officer Dr. Aldrin Malsawmtluanga’n certificate a hlan nghal a ni.