September ni 21, 2019 (inrinni) khan NEZCC, Shilpagram, Panjabari, Guwahati ah  Guwahati Mizo Students’ Union ten Freshers' Day an hmanga, Mizoram Lok Sabha MP Pu C.Lalrosanga chu Khuallian a ni.

Pu C.Lalrosanga chuan zirlai kalkhawm hmaah thu sawiin, tunhma atanga Mizo tihmingtha thin tu Guwahati Mizo zirlaite chu an zirna kawnga hming chhertu ni zel tur leh, kawng hrang hranga hnam dangte entawn tlak khawp a tang zel turin a fuih a. An zirlaite chu taima taka bei tang tang a, thil tha titur a siam an ni tih hre reng a, mahni tanghma chauh hai lova, ram leh hnam thatna tura thil tha tihna kawng zawh theuh turin a chah. Zirna hian ram leh hnam, khawtlang, chhungkuaah te a tha zawnga kawng hrang hrangin hmasawnna  kengtel se a duh tih sawiin, chutiang tur chuan an ngaihtuahna hmanga hmalam pan zel tura theihtawp chhuah zel turin zirlaite a fuih nghal bawk.

Zirlaite hian khuallian hi Lok Sabha MP a tlin lawmpuina leh chawimawina thuziak an hlan a, Mizoram pawna cheng mizo ten amahah rinna an nghatin an  thlamuanpui tak zet a ni tih an hrilh.

Guwahati Mizo Welfare Association hruaitute pawhin lok sabha MP Pu C.Lalrosanga hi a thlenna Mizoram House ah hmuin MP a a tlin lawmpuina thilpek Samak Lim (Assam State Logo) an hlan a ni.