Vawiin khan Lunglei DC Conference Hall-ah Tripura Bru Relief Camp  atanga Lunglei District a Bru chhungkaw 364 hruai kir tura inpuahchahna kal mek thlirho turin District Level Core Committee an thukhawm. Thutkhawmna ah hian Lunglei DC Pi K. Lalrinzuali, SP Pu C.Lalthanmawia te bakah a kaihhnawih sawrkar Department hotute leh Sub Hqrs YMA hruaitute an tel.

Meeting-ah hian Bru chhungkuate Lunglei District-a an rawn let na tur khaw pali – Dinthar, Buknuam, Putlungasih leh Chawilung ‘S’ Administrative Officer theuh te atangin an inpuahchahna report ngaihthlak a ni a. Heng Bru chhungkuate innghah lailawkna (temporary shelter) hmun tur pawh duang fel tawh niin hmalakna a kal mek thu meeting-ah hian ngaihthlak a ni. DTO atangin lirthei dinhmun, DCSO atangin ei leh bar, P&E atangin kawlphetha, PWD atangin kawng dinhmun tlangpui leh siam that la ngai te, PHE atangin tui supply dinhmun te ngaihthlak a ni a.  Lunglei DC Pi K. Lalrinzuali chuan Department official kalkhawmte chu an mawhphurna theuh fimkhur leh tha taka hlen chhuak turin a chah nawn leh a ni. Lunglei SP Pu C. Lalthanmawia hnen atangin security arrangement chungchang ngaihthlak a ni bawk.

Lunglei District ah hian Bru chhungkaw 364 an zavaiin mi 2051 hruaikir tur niin Khakchangpara camp atangin chhungkaw 3, Hamsapara Camp atangin chhungkaw 2, Naisingpara Camp atangin chhungkaw 54 leh Hazacherra camp atangin chhungkaw 305 an ni. Heng chhungkaw 364 te hi Lunglei District huam chhunga khaw pali- Putlungasih – chhungkaw 121, Chawilung S – chhungkaw 43, Dinthar – chhungkaw 187, leh Buknuam – chhungkaw 13 ah hruaikir an ni ang. An rawn letna tur khaw pali ah te hian Revenue Department-in House Site Plan mumal tak an siam tawh a ni. Heng Bru chhungkuate hruai kir tur hian Lunglei Government College atangin Liaison Officer (LO) pali – Pu R. Lalrochama, Pu Lalhriattira Fanai, Pu Z. Lalthanliana leh Pu Lalthanmawia te ruat niin an hnathawhnaa puitu tur Supporting Staff (SS) engemawzat ruat an ni bawk. Lunglei District Bru hruai kir hna hi tun dinhmunah thawh nga (5 Batches)-a kalpui tura ruahman niin 1st Batch Repatriation hi 03/10/2019 (Thursday) ah Naisingpara Camp rawn chhuahsan-in 06/10/2019 (Sunday) ah an innghah lailawkna (temporary shelter) thlen pui beisei an ni. 1st Batch Repatriation atan hian Bus 19 leh motor dang engemawzat ruahman a ni.

August ni 16, 2019 khan Lunglei DC Pi K. Lalrinzuali hovin officials-te leh YMA Sub Hqrs hruaituten Bru laklet na tura inpuahchahna a hmuna tlawhin Dinthar leh Putlungasih anlo tlawh tawh a. Tun kar chhungin DC ho vek hian Chawilung S leh Buknuam tlawh leh turin ruahmanna siam mek a ni.