1720/2023-2024

31st August, 2023: Lok Sabha MP Pu C.Lalrosanga chuan vawiin khan New Delhi-a Parliamentary Standing Committee on Health and Family Welfare ṭhutkhawmnaah Mizoram leh hmarchhak bial State hrang hranga Central Government Health Scheme (CGHS) hman dan chungchanga duhkhawp lohnate a sawi chhuak.

Pu C.Lalrosanga chuan Mizorama central sawrkar hnathawk leh pension tawhte'n an dam loh nikhuaa Private Hospital-a Central Government Health Scheme (CGHS) an hmana  an hlawkpui ve theihna tura ruahmanna siam rang turin Health and Family Welfare Ministry a ngen a. CGHS hmang hian sawrkar enkawl loh damdawi in dangahte pawh man tlawm zawka damlote enkawl an nih theih nan CGHS huamtir empanel a ngai a ni a ti. Hmarchhak biala sawrkar hnuai ami ni lo damdawi in ten he scheme hi an hman duh huna empanel an nih nan CGHS hnuaia damlo enkawlna leh damdawi mante tipung tura ennawn a ṭul thu a sawi bawk.

Hmarchhak biala Central sawrkar hnathawk laite leh pension tawhte Guwahati AIIMS damdawi in-a sumfai pe lova enkawl an nih ve theihna tur cashless facility ruahmanna siam tura thuneitute chu nawrin Pu C.Lalrosanga chuan CGHS aṭanga damdawi pekchhuah ṭhenkhat a ṭha tawk lo a ni tih a sawi a, damdawi ṭha chauh leia pechhuak ṭhin turin sawrkar hotute chu a ngen nghal bawk. Pu Rosanga hian hmarchhak State-te zingah CGHS Wellness Centre la awm lohna Arunachal Pradesh khawpui Itanagar-ah pawh din ve thuai a ṭul thu a sawi bawk a ni.

Hriselna enkawl chungchanga Parliamentary Committee ṭhutkhawmah hian member dang MP-te bakah Health and Family Welfare Ministry hnuaia Secretary leh hotu lian dangte an tel a ni.