No.487/2020-2021

Mamit 21st April, 2020 : Vawiin khan Sub. Divisional Horticulture Officer, Mamit, Tuidam Division hnuaiah Mamit khawpui chhunga Village Council/Local Task Force tin te'n an huam chhunga thlaichi an semchhuah tur Pu Lalrosanga Khiangte, MHS Sub. Divisional Horticulture Officer (SDHO) chuan a sem.

Vawiin thlaichi semchhuahna hun-ah hian Pu Lalrosanga Khiangte MHS, SDHO, Mamit chuan tunlai khawvelah hrileng buaipuiawm tak kan hmachhawn mek lai hian Loneitute dinhmun tur Mizoram Sawrkar chuan a hriatthiampui hle a, thlai tharchhuah lamah kan khaihlak emaw harsatna kan tawh lohna turin, hun chep tak karah hmanhmawh leh rang takin Horticulture Department- te chuan thlaichi an buaipui thu a sawi. Thlaichi chi hrang hrang semchhuahte chu a nih tur ang taka ching a, tam zawk leh hlawk zawka tharchhuak ngei turin Loneitute duhsakna a hlan nghal a ni.

Horticulture Department Mamit-in thlaichi a semchhuah hi Mamit khawpui chhunga Village Council hrang hrang paruk bakah Phaizau VC huam chhunga a mamawhtute tan pekchhuah tel nghal an ni a. Village Council theuhte hian anmahni huam chhung theuhah mipui pungkhawm lo zawngin, ruahmanna felfai tak Horticulture Department-te nen siamin an semchhuak leh a ni.

Mamit District tan hian thlaichi chi hrang hrang, Fanghma, Changkha, Bawrhsaibe, Behlawi sei chi, Hmarchapui, Bean, Behlawi dum chi leh a lian chi, Antam chi hrang hrang leh Snakegourd dawn niin Tuidam, Mamit, Rawpuichhip, W. Phaileng leh Reiek huamchhung khawtin Village Council-te tan rualkhai thei ang bera semchhuah a ni.

Vawiin thlaichi semchhuahna hun Sub. Divisional Horticulture Office-a neihah hian Mamit khawpui chhung Village Council hrang hrang aiawhte bakah Pu Paul Rokima, DIPRO Mamit- te an tel a ni.