Vawiin khan Directorate of Land Revenue & Settlement buatsaihin Mizoram District 6-a Department Officer leh Staff te tan ‘Workshop on Revenue Administration’ chu neih tan a ni a. LR&S Minister Pu J.H.Rothuama chu Khuallian niin Workshop a hawng. LR&S Director Pu Lalengmawia’n Workshop hawnna inkhawm a kaihruai a, District hrang hranga Settlement Officers te atangin department hmalakna report ngaihthlak a ni nghal bawk.

 

 

Revenue Department hnathawk kalkhawmte fuihna thu sawiin Minister chuan Revenue Department chu department pawimawh ber zing ami, a tel lo chuan sorkar leh ram a kal thei lo a ni, a ti. Department pawimawhna chuan mawhphurhna sang tak a keng tel a, chuvangin an hnaah rinawmna leh taimakna nen, fimkhur tak leh hlemhletna tel lova thawk turin Minister chuan a beisei a ni. Mizoram sorkar thar chuan retheite chu ngaih pawimawh VIP-ah a dah avangin hetiang mi, in leh lo, hmun ram mahni puala la nei ve lote hi engtiangin nge sorkarin a puih ang tih chu he department officers te hian an rilruah hre reng turin a chah a ni. Retheite chhanchhuahna tur NLUP-ah pawh kut hnathawktute tan lo hmun nghet ruahman sak a tul dawn avangin Revenue Officer te chu an pawimawh hle dawn a, an hnathawh turah pawh dik leh fel, belhchian tlak a ngai dawn a ni, a ti.

Revenue Commissioner Lalbiaktluanga Khiangte pawhin thu sawiin he department hi sorkarin a ngaihvena, an inrelbawlna leh kalphung hrang hranga sum lam harsatna te pawh Asian Dvelopment bank hmang tangkaiin a thuamtha dawn a ni, a ti a. Department chhunga hna semzai pawh tih thuai a ni ang, a ti. Ram tehfel Cadastral Survey pawh tun aia chak leh huamkim zawka tihdan ruahman thu te, ram chungchanga Dan leh Hrai ennawn leh a thar buatsaih tur thu te sawiin Commissioner chuan chhiah khawn chungchangah departmentin hna an thawk tha thawkhat avangin lawm thu a sawi.

Vawiina ‘Workshop on Reforms of Revenue Administration’ hian a tum bulpui ber chu Land Record mumal zawka siam a nih theih nana hmalak dan tur te, ram leilunga thuneitu nihna anga NLUP hmalakna a chak zawka mawhphurhna hlenchhuah nan te, ram leilung chhiah khawn changtlung zawka kalpui dan turte leh tuna District level thleng chauhva Revenue Set-up awm hi Village level thleng inzamchhuak thei tura Department inrelbawldan siksawi chungchang te zir hova dikna leh felfai zawka ram leilung enkawlnaah mipui rawngbawl a nih theih nana intuaitharna atana ruahman a ni.

Land Revenue & Settlement Department hian Mizoram chhunga cheng chhungkaw tinte inhmun, lo leh huan ram te tehfela Land Record siama rambuai chinfel leh mimal ram humhalhpui leh chhiah khawnah te mawh a phur a, Revenue enkawl tura Town-a puan khaw 74-ah hian Inhmun Pass leh LSC-te pekchhuah an ni. Kum 2008-09 chhungin Land Revenue & taxes-ah cheng nuai 264 hmuin hmuh tura bithliah cheng nuai 195 chu Rs.69 lakhs-in a khum a ni.