Vawiin khan Save Chite Lui Coordination Committee (SCLCC) leh Aizawl Theological College tangkawp chuan Synod Conference Centre, Aizawlah “Lui leh tui hna humhalh” chungchang seminar an buatsaih.

He seminar kaihruaitu SCLCC founder Chairman Pu Lalmalsawma, IAS (Rtd.) chuan sik leh sa inthlak danglam nasa lutuk hi mihringte sulhnu a ni a, tun hmaa thil lo thleng tur anga sawi thin, thing leh mau tih chereu nasat avanga kan environment lo chhe ta chuan tunah hian a takin min nang ta a ni, a ti a. Chite lui chhanchhuah hna atanga bul tanin lui leh tuihna humhalh pawimawhzia inzirtir zel an tum thu he hunah hian a sawi a ni.

Save Chite Lui Coordination Committee hi sawrkar hotute leh tlawmngai pawl hrang hrangte telna niin June 2, 2017 khan a ding tan a. SCLCC thutkhawm hmasak ber hi Raj Bhavan-ah Governor hova neih niin Mizoram Governor leh Chief Minister te hi SCLCC patron member an ni a, Chief Secretary chu Chairman a ni.

Seminar-ah hian Rev. Dr. K.Lallawmzuala,Professor, Aizawl Theological College chuan “God, People and Water; Insights from the Bible” tih thupui hmangin thu a sawi a. Chawhnu ah thupui sawihona neih a nih bakah Rev. Dr. L.H.Rawsea, Associate Professor, ATC chuan thuchah a sawi a ni.