No.3432/2021-2022

Aizawl the 16th December 2021: Ni thum awh (14th-16th December, 2021) 38th Mizoram Secondary School Games, 2021 chu Lungleiah hlawhtling taka zawh fel niin vawiin chawhnu khan School Education Minister Pu Lalchhandama Ralte hovin Lunglei ?huamluaia Mualah kharna hun hman a ni. He hunah hian School Education Department logo thar, Pu Lalnghinglova, Principal, ERMS-in a design chu Minister hian a tlangzarh nghal bawk a ni.

Kharna inkhawm hi Pu James Lalrinchhana, Chairman, Mizoram School Games Committee & Director, School Education Department chuan kaihruaiin MYC Chairman Dr Vanlaltanpuia, MLA, MBSE Secretary Pu Lalthangbika, Lunglei DC Pu Kulothungan A, Pu Lalhmachhuana, Organising Chairman leh State Project Director, Samagra Shiksha leh Department thawktute, zirtirtute leh zirlaite leh sawm bik dangte an tel a ni.

School Education Minister Pu Lalchhandama Ralte chuan nikum 2020 ah Covid-19 hrileng avangin Mizoram School Games hman theih a ni lova, kuminah SOP bawhchhe lova tih theih dan kawng dapin Mizoram Secondary School Games neih theih a ni te leh District zawng zawng a?anga zirlai infiammite an tel thei chu lawmawm a tih thu a sawi. Sawrkar laipui hmalaknain Fit India Movement India ram pumah ngawrh taka kalpui chhoh mek niin Mizoram Secondary School Games pawh chu Fit India Movement tih hlawhtlinna leh a peng pawimawh tak pakhat anih thu a sawi a. Zirna leh sports chu thil kal kawp tlat an nih avangin School Education Department chuan sports leh fitness a ngai pawimawha, hun lokal zel turah School Games-te uar zawka ruamhan zel tum anih thu a sawi. Zirlaite hnenah fuihna thu sawiin an zirlai lehkhabu mai piah lamah an hawiher ti zau a, infiamna, music, lehkhabu chhiar te ngaihven tel tur leh an talent mila eizawnna nei thei tura inpuahchah chho turin a chah a ni.

Zirna lamah Mizoramin hmasawnna rahbi pawimawh tak a rap chho mek tih sawiin sawrkarin zirtirtu mamawh phuhruk te, hmasawnna ruhrel ruahman te, zirtirtu training te hripui karah kalpuiin, zirtirtu 2000 chuang lak an nih tawh bakah, Hindi zirtirtu 300 chuang lak result pawh tihchhuah mai a ni dawn a, heng bakah hian SEDP kaltlangin post engemawzat hnawh khah tum a ni, a ti bawk. Zirna ti hmasawn turin Sawrkarin theihtawp a chhuah mek zela, zirna lamah hmasawnna nasa tak kan hmu chho mek a ni tiin, sawrkar hmalakna chu tawiawm turin mipuite a sawm a ni.

Pu H. Lalsanglura PEO& Organising Secretary-in report a pek danin 38th Mizoram Secondary School Games 2021-ah hian District zawng zawng 11 atangin Secondary School infiammite an tel thei a. Aizawl District chu North leh South-ah ?hen anih avangin District hi 12 an ni. Kumin hi District thar 3, Khawzawl, Saitual leh Hnahthial te an District hming anga an tel ?an kum a ni bawk a ni. Infiammite hi Mipa 151 leh Hmeichhia 128 leh Zirtirtu 51 an vaiin mi 330 he school Games-ah hian an tel a, Lunglei khaw pawn atangin mi 288 an tel thei a ni a ti a.

Kuminah hian hripui leng kara Games huaihawt anih avangin, kum dang aiin infiamna item tih tlem a nih bakah C.A.B zawm chunga khelh theih tur thlangin heng; Athletic (Boys & Girls), Badminton (B&G) Judo (B&G) leh Table Tennis (B&G) ah te intihsiakna buatsaih ani.

Intihsiakna hrang hrangah Lunglei District chuan Gold medal 7, Silver 8, Bronze 4, a vaiin Medal 19 hmuin Overall Champion an ni a. Aizawl North in Gold 5, Silver 3 leh Bronze 3 a vaiin medal 9 hmuin pahnihna an ni a, Kolasib District-in Gold 4, Silver 1, Bronze 1, a vaiin medal 7 dawngin pathumna an ni. Athletics hnuaiah Henry Lalmalsawma, Vanhne H/S Lunglei District chu Best Athlete (Boys) lawmman dawngin Lalpeksangi, Govt Lallengvunga H/S Serchhip District chu Best Athlete (Girls) lawmman a dawng a ni.