Vawiin khan Clean Mizoram Movement, Lunglei District hmalaknain ‘Fai Hnatlang Runpui’ huaihawt a ni a, tukin zing dar 9:30 khan Lunglei DC Office kawtah hawnna inkhawm neiin Lunglei DC Pu Ashish Madhaorao More chuan hnatlang bul a tanpui a ni.

‘Faina Hnatlang’ hawnnaah DC Pu Ashish More chuan Mizoram leh ram hmundangah te pawh India Hnam Pa Mahatma Gandhi piancham pualin faina hnatlang neih a ni thin a, Clean Mizoram Movement-te hmalakna chak tak azarah Mizo mipuite pawhin fai leh thianghlim taka khawsak pawimawhzia an rawn hre chho mek zel a; chumi piah lamah mitin an thinlung puthmang pawh thianghlim se, chenho a ti nuam zual ang, a ti. Mizoram eco-system tha tak vawnghim tur chuan ramchhunga thing leh mau leh nungchate kan duat thiam a, kan venhim thiam a tul tak zet bawk a. Lunglei District chu ‘Green Lunglei, Clean Lunglei’ ah i siam ang u tiin DC chuan mitinte faina lamah hmasawn zel turin a chah a ni.

Clean Lunglei buatsaihin Lunglei khawpui dung kawngpui tihfai hnatlang neih zui nghal a ni a, bawlhhlawh paih truck trip 2 bawlhhlawh chhar fai a ni a, khawpui hmun 2-ah bawlhhlawh bawm dah belh a ni bawk. Vawiina hnatlangah hian Lunglei Government College leh Govt Higher Secondary School zirlaiten ‘Clean Lunglei’ hi an tawiawm a. Faina hnatlang hi Civil Hospital atanga tanin DIPRO Office, Bazar Veng-ah a kharna hun hman a ni.