Vawiin chawhnu ah khan Chief Minister’s Conference Hall ah PWD Minister Pu Lal Thanzara chuan sawrkar mi pawimawh leh sawm bikte kawm in Mizoram tana VIP road, bungrua leh chak lakna ber, National Highway 44A hnawhping thintu Rangvamual khawchhunga kopang chim thin siamthat dan tur a sawipui a. NH 44A rawn pawh tu, Sakawrtuichhun leh Lungverh, PTC Lungverh tia sawi thin inkar kawng thawmthat meka hmasawn dan te ngaihthlak a ni bawk.

PWD Minister Pu Lal Thanzara chuan NH44A hi Mizoram hnuk a nih bakah khualzinte tana kawng pawimawh tak a nih avangin kumin fur chhung hian a ping thiang lova, Rangvamual a kawng ping laia leivung thenfai leh kopang min tur tih ziaawm nan hian sum indaihlohna karah pawh kut kan thlak thuai a ngai a ni a ti a. Kawng siam that hna hi February thla chawhma ngeia tan hman a nih theih nan PWD( National Highway) hotute, DM&R hotute leh Geology & Mineral Resources Department te chu inrawn khawm tur leh an hmalaknate kar khat hnua amah hriattir leh turin a hrilh a ni.

Meeting hi Pu Lalram Thanga, Principal Secretary, PWD in a kaihruai a. Meeting ah hian PWD in kawngpui chei thatna a neih sum te pawh hmun danga hmang lova helai kawngpui siam that hmasak nana a hman mai te pawh a tul theih thu leh helai kawngpui, Mizoram ei leh bar lakluhna ber a pin chuan kawngpui thenkhat repair chuan hlutna neih tam dawn loh thu a rel bawk a ni. Aizawl Bawrhsap Dr. Franklin Laltinkhuma, Dr H.Lallenmawia leh Er. R.Vanlaltluanga, E-in-C, PWD ten NH43A huam chhunga leimin kaihhnawih thila sawrkar hmalak tawhna leh hmachhawp te an tarlang a. Heng an hmalakna bawhzui ngai te hi a ranglam a ngaihven turin meeting chuan mawhphurhna latute chu a hrilh nghal a ni.Hemi hnu hian Er.C.Lalrinawma, CE(Building) chuan Sakawrtuichhun atanga PTC bula NH43A rawn pawh tu kawngpui 4.6Km a thui an siam that mek chungchang report a pe leh a. Rangvamual leimin kaihhnawih a Revenue in dan leh thuneihna an hman theih te Pu Zothankhuma, Secretary, LR&S hnen atanga ngaihthlak a nih hnu in Er.Lianchungnunga, Secretary, PHE,etc., leh Er.Ramhluna Khiangte, E-in-C(Rtd.) te hnen atangin Highway siamthat nana sum hman theih chungchang te bakah rawtna te ngaihthlak a ni.