Vawiin chawhma dar 10:00 khan Mizoram State Sports Council (MSSC) chuan tun hnaia India ram pum huap sports discipline chi hrang pathuma medal late lawmpuina hun a buatsaih a, he hun hi Er. Lalrinawma, MLA chuan a hmanpui.

Pu C.Laltlanthanga, Secretary Mizoram State Sports Council chuan kaihruaiin tun hnaiah sawrkar laipuiin Olympic leh khawvel huap infiamna khawmpui liana medal late sumfai dawn tur a tihpun thu a sawi a, kan hmaa National Games awm turah Mizoram aiawha gold medal late chuan Rs. 3 lakh, silver medal laten Rs. 2 lakh leh bronze medal la ten Rs.1 lakh an dawn tur thu a sawi. Team event-a gold medal laten Rs. 30,000/-, silver medal laten Rs.20,000/-, bronze medal laten Rs.10,000/- an dawn tur thu a sawi bawk.

Khuallian hian medal latu player 17 leh team official mi 4 te hnenah lawmpuina thilpek a hlan theuh a, MSSC chuan khual lian hnenah ngaihhruina thilpek a hlan ve bawk.

Vawiina medal lawmna hunah hian infiamna discipline pathum - Judo, Sepaktakraw leh boxing-a medal late lawmpui an ni a. Ni 17-21, December, 2014 chhung khan Haridwar, Uttarakhand-ah National Junior Judo Championship, 2014-15 neih a ni a, Mizoram chuan gold 1, silver 3 leh bronze 2 an dawng.

Judo-medal dawngtute -

1. L.Nunkima Vangchhia, Below 55Kg - Gold

2. Lalnunfela, Below 50Kg - Silver

3. Zonunsangi, Below 40Kg - Silver

4. Vanlalhluzuali, Below 44Kg - Silver

5. Vanlalfaka, Below 55Kg - Bronze

6. Lalmawizuali,  Below 30Kg - Bronze

 Manager : Madhu Chhetri

Coach - Jonathan Rozarliana & Zothansanga

Ni 11-14, January, 2015 chhungin Kurnool, Andra Pradesh-ah 17th Sub Juinior Sepaktakraw Championship neih a ni a, Mizoram team chuan a vawikhat nan silver medal an dawng. Mizoram team hian final-ah 1-2 in Odhisa an hneh lo a ni.

Silver medal latu Mizoram team te chu :

1. Lalrohlua, 2. Lalmuanchhunga, 3. Lalruatsanga, 4. Vanlalremruata 5. Lalbiaktluanga 6. C.Lalruatpuia 7. Lalthazuala 8. Terra Lalnunpuia 9. KC Lalramluaha 10. Emmanuel Lalremngheta. Coach - KA Jotin Singh.

Ni 8 - 18, January, 2015 chhungin Nagpur, Maharashtra-ah 1st Elite Senior Men National Boxing Championship 2015 neih a ni a, Mizoram chuann silver medal pakhat a dawng.

He championship hi National Games 2015 lo awm tur atana qualifying a ni nghal a, Mizoram aiawha kal boxer 7 zingah NT Lalbiakkima, Saiha chuan silver medal a dawng a, quarter-final thleng chinin National Games an khel thei a, Mizoram boxer dang 4-te an qualify ve bawk a ni.