Lunglei-a cham mek Social Welfare Minister Pu P.C. Lalthanliana chuan vawiin khan Serkawn-a Lena Stadium sak mek a tlawh a, khawtlang mipui thahnemngaihna avanga he Stadium hi tihpuitlin a nih theih dawn chu a lawmawm takzet a ni, a ti a. Stadium sak theih nan hian Chief Minister leh Sports Minister thahnemngaihna leh duhsakna zarah beisei phak aia tha a sak a ni thei dawn a; Stadium ram atana mimalin ram an pek chu a lawmawm hle a ni a ti.

Lena Stadium hi Cheng vaibelchhe 24.18 hmanga sak a ni a, nakum May 2016-a zawhfel hman beisei a ni. He Stadium sak hna hi Trilok Associates, New Delhi-in an thawk mek a, mi 3000 vel leng tura ruahman a ni. Playground bakah pavillion, gallery leh 8-lane athletic track pawh he Stadium Complex-ah dah a ni vek ang.

Vawiin vek khan Minister Pu P.C.Lalthanliana chuan Serkawn Middle School Complex-a Social Welfare Department kaltlanga sak tur Tribal Girls’ Hostel sakna hmun tur a en nghal a. He Girls’ Hostel hi Cheng nuai 384 hmanga sak tur a ni a, zirlai hmeichhia 100 leng thei tura ruahman a ni ang. He hnuah Pu P.C.Lalthanliana chuan Serkawn Community Hall pawh a en nghal a, Hall thawthatna nan a bultan nan Cheng nuai 10 a pek tur thu khawtlang hruaitute a hrilh a ni.

Minister-in heng hmun a tlawhnaah hian sorkar officials, LDSC hruaitute, Lunglei MJA member ten an tawiawm a ni.