Mizoram sorkara Disaster Management & Rehabilitation Department leh National Disaster Management Authority (NDMA) tangkawpin vawiin khan Lunglei-ah ‘Earthquake Mega Mock Drill’ huaihawt a ni a. Lunglei DC Office inchung atangin chawhma dar 11:00-ah siren tihrik a nih veleh Lunglei khawpui hmun 4 - Sobji Market, Chanmari; Saikuti Hall, Venglai; JB College, Bazar Veng leh Serkawn Road - ah te lirnghing vanga chhiatrup anga lemchangin Medical, Police, MPRO, Traffic police, NDRF leh SDRF, Sub Hqrs YMA Search & Rescue Team leh Adventure Club Team te chu heng hmun te pan nghalin chhanchhuahna hna leh a tul ang angte an thawk a ni.
‘Mega Mock Drill’ neih zawhah DC Conference Hall-ah a kaihhnawih District officials, Police, Medical, National/State Disaster Response Force, Assam Rifles, BSF, NGO leh volunteer hrang hrangte chu thukhawmin; NDMA Sr. Consultant Pu Shivaji Singh leh Jt.Adviser Pu DS Sindhu kaihhruaina hnuaiah vawiina ‘mock drill’ chungchangah ‘de-briefing’ (ennawnna leh sawihona) neih zui a ni.
Mock Drill neihna hmun 4 bakah Civil Hospital, Serkawn Christian Hospital, BSF MI, Relief Camp leh Staging Area-a Incident Commander leh Observer theuhte dah niin de-briefing-ah hian report an pe theuh a; a pumpuiah disaster incident response chu tha thawkhat hle laiin inbiakpawhna (communication) lamah harsatna a awm thu an tarlang. Lirnghing thlen thut pawha ‘Drop-Cover-Hold’ tur erawh mipui tam zawk chuan an la hre lo hle tih hmuh a ni a, hei hi a zau thei ang bera inzirtir tura hmalak a tul tih sawi a ni bawk.
NDMA Sr.Consultant Pu Shivaji Singh chuan vawiina ‘mock drill’ kalpui a nih danah a lungawi thlak hle a tih thu sawiin a khat tawka tih thin turin district officials-te a chah a; a bik takin zirna in zawng zawngah huaihawt a, zirlai naupangte pawhin chhiatrupna thlen pawha chiai lova an tih tur an hriat theuh nan a pawimawh hle a ni, a ti. NDMA Jt.Adviser Pu DS Sindhu chuan inbiakpawhna neih that leh Helpline engemawzat ruahman a pawimawh thu a tarlang bawk.
District Incident Commander Lunglei DC Pu Abhijit Vijay Chaudhari chuan lawmtu sawiin vawiina mock drill hlawhtling taka neih theih tura tha leh zung seng zawng zawngte an fakawm hle a ni, a ti a. Lunglei SP Pu Zosangliana leh Lunglei CMO Dr.VLMS Dawngliana leh Lunglei Addl DC Pu Rothuama ten Police, Medical leh DC Office Staging Area hmalak dan chungchang an sawi bawk.
