Vawiin khan Lunglei Saikuti Hall-ah ‘Kuthnathawktute Ni / Farmers Day’ lawmna inkhawm neih a ni a, LAD, etc. Minister Pu PC Lalthanliana chu Khuallian niin he hun hi a hmanpui a ni. Mizoram sorkar flagship programme NLUP hman tan ni January ni 14 hi kum 2013 atang khan sorkarin ‘Kuthnathawktute Ni’ atan a ruat a ni a. Vawiina he Ni lawmna inkhawmah hian Lunglei DC Pu Ashish Madhaorao More chu Chairman niin Lunglei District NLUP Coordinator Pu Zathangliana bakah NLUP Line Department officials te an tel kim hle.

Saikuti Hall khata Lunglei District hmun hrang hrang atanga kal khawm kuthnathawktute fuihna thu sawiin Khuallian Minister Pu PC Lalthanliana chuan Zoram politics leh ram kalphung siam thatna kawngah kuthnnathawktute pawimawhzia sorkarin a hria a, chuvangin kuthnathawktute chawikanna turin NLUP chu duan a ni a, anmahni pual liau liauvin ‘Kuthnathawktute Ni’ ruat a ni bawk a, awmze nei zawka ram hmasawnna zel turah dinhmun leh aw an neih ve theih nan sorkarin a duhsak tak zet a ni, a ti. Sum leh paiah harsatna engemaw chen awm chung pawhin sorkarin kuthnathawktute hnenah tanpuina sem a nih theih nan hma a la zel a, tanpuina dawntute pawh lawmna chang hria a, an trade thlan theuhah rinawmna leh taimakna nen hlawhtling ngei turin an bei ve hi an bat ve a ni, a ti a. Thawhrimna tel lovin hlawhtlinna a awm thei lova chuvangin hausak tumin hna thawk lovin hlawhtling turin hna thawk zawk turin Khuallian chuan a chah a ni. Sorkarin kuthnathawktute hma ngaiin contract pekchhuah reng rengah zaa 1% chu ‘Labour Welfare Scheme’ah a chhung lut thin tih sawilangin Pu PC Lalthanliana chuan he Welfare Scheme hnuaiah hian kuthnathawktu kum 60 chuangte tan pension te, an fate lehkha zirna tanpuina te, life insurance bakah chhiatna tawh pawha tanpuina tur te pawh ruahman tel a ni a; District tina Labor & Employment Office-ah Form dah niin engtiklai pawhin a in-register theih a ni, a ti.

Lunglei D.C. Pu Ashsish More pawhin thu sawiin khawvel eng ramah pawh kuthnathawktute chu dah pawimawh an ni a, a chhan chu an tel lovin nitin khawsak a rel theih lova, mitinin kan mamawh phuhruktu te an ni, a ti. India ramah zaa 65-70% chu kuhnathawktu/loneitu te an ni a, chuvangin anmahni puala ‘Farmers Day’ kan lawm pawh hi a awm hle a, sorkar leh AMFU tangkawpa Mizoram dung leh vangah he Ni lawmna inkhawm buatsaih a nih chu a lawmawm tak zet a ni, a ti bawk.

AMFU aiawha thusawitu Pu H.Lalthansanga, Executive Committee Member chuan sorkain kuthnathawktute ngai pawimawh a, ‘Farmers Day’ a siam hi a lawmawm takzet a, hlawkna ringawt um lovin rinawmna leh thawhrimna nen ram leh hnam siam kawngah tan i la zel ang u, a ti a. Kumin 2015 chu AMFU-in ‘Buh Thar Am Kum’ ah a puang a ni tih a tarlang bawk.

Vawiin ‘Farmers Day 2015’ lawmna inkhawmah Lunglei District NLUP Coordinator Pu Zathangliana’n Report-a a tarlan danah Lunglei District huamchhungah beneficiaries zawng zawng chu mi 22208 an ni a. Vawiin inkhawmah hian khaw 187 atanga beneficaries mi 920 hnenah Agriculture, Soil & Water Conservation, Horticulture, AH & Vety leh Sericulture hnuaiah tanpuina pek a ni.