2108/2022-2023
Lunglei 29th September 2022 : Vawiin khan District Veterinary Office Conference Hall, Lunglei ah Agriculture Technology Management Agency (ATMA) leh Animal Husbandary & Veterinary Department tangkawpte buatsaih ran vulh dan tha leh arvulh dan dik leh hlawk zawk inzirtirna Production Technology of Livestock and Poultry hun hman a ni. Dr. Vanlalhruaia, DVO, Lunglei chuan khuallian niin a hmanpui.

He hun hi ATMA Lunglei Project Director Dr. V. Zodinsangan a kaihruai a, khuallian Dr. Vanlalhruaia chuan thu sawiin ranvulha eizawngtu leh a tuimite tana ranvulh dan tha leh arvulh dan dik inhrilh hriatna hun hman chu mimal tan a tangkai rualin khawtlang leh ram tan hmasawnna thlentu a nih theih thu a sawi a, chumi atana kalphung thar leh thiamna tha zawk mithiam ten an zirtir chu tangkai taka hmang tur leh hlawk zawka ran an vulh a duh thu a sawi a, mizote pawhin kan zawh tawk thiamna thar hmanga kalphung hluite kalsana thiamna sang zawk mithiamte hnen atanga zir chung zela hlawk zawka hnathawh zir a hun tawh hle tih a sawi bawk a ni.

Vawiin a Farmers Scientist Interaction ah hian Lunglei khaw chhunga ranvulh lama tuimi thahnem tak an kal khawm a, Dr.V.Zodinsangan hlawk zawka arvulh dan chung chang zirtirna pein Dr. Vanlalchhandaman ran vulh chung changa hriat tur pawimawh a zirtir bawk a, K. Israel Lalawmpuian khuarel chhiatna tawh thulha ranvulhte insurance dan tur a sawi bakah ranvulhtu ten bank loan an hman tangkai dan tur leh a kalphung a zirtir ve thung a ni.