Kangmei laka inven dan chungchang mipuite hrilhhriat hun ‘Fire Prevention Week 2014’ hawnna inkhawm chu tukin zing dar 7:00 khan Saikuti Hall, Lunglei-ah hman a ni a, Lunglei Addl. DC Pu Lalhmachhuana-in inkhawm a kaihruai a ni. Kumin thupuiah ‘Ram hmangaihtu chuan ram a ti kang lo’ tih hman a ni.

Fire Prevention Week 2014 puala thusawitute chu Pu Stephen Lalrinawma, Addl. SP, Lunglei; Pu Lalrotluanga, Secretary, Sub-Hqrs YMA; Pu K.Lalrinpuia, President, MJA Lunglei leh Pu C.Zairemthanga, Honorary Wildlife Warden, Lunglei District te an ni a. Vawiina thusawina hun hmangte chuan ram tikangtu chu ram hmangaihtu an ni lo tih uar taka sawiin Pathian siam thing leh maute chu duat taka enkawl hi mihringte mawhphurhna a ni tiin mipui kalkhawmte hmaah an sawi a. Nikum 2013 khan Fire Department-te chuan kangmei chhuak thelh turin vawi 45 an tlanchhuak a, vawi 2 chu In kang a ni a, vawi 43 chu ramkang a nih thu Addl SP Pu Stephen Lalrinawma chuan tarlangin, kangmei chhuahna chhan ber chu fimkhurh tawk loh vang a ni, a ti. Ninhlei vang emaw fimkhur loh vang emaw kangmei tichhuaktu chu IPC 430 hmangin kum 7-10 chhung tang tura hrem theih a ni a; Fire Department hnena dawt hrilh chu thla 3 chhung tang tura hrem thei an ni bawk, a ti. Mizoram sorkarKangmei chhuak a awm chuan a rang thei ang bera tlanchhuak turin Lunglei District Fire Department-e chu an inpeih reng a; Lunglei khawpui chhung hmun 4 - Lunglawn, Chanmari, Kikawn leh Zotlang - ah te PHE Department chuan an tui hman tur an dah sak a ni. Fire Department kohna telephone number chu 0372-2323101 a ni.

Vawiin chawhma vek dar 11:00-ah Lunglei 3-Gate atanga Pukpui thleng ‘Fire Prevention Week 2014’ pualin kawngzawh a ni a, Veng hrang hrangah dingin aurinna hmangin mipuite chu kangmei laka inven dan tur hrilh zel an ni. Fire Prevention Week kawngzawh-ah hian Environment & Forest, 2 Bn MAP, Fire Department, I&PR Department, JB College leh Lunglei Polytechnic NSS member thahnem tak an tel a ni.

Mizoram pum huapa kangmei laka inven dan inzirtirna leh hna thawk tha berah Lunglei District chu pakhatna niin lawmman Rs.20,000/- an dawng bawk a ni.