457/2024-2025

LUNGLEI; the 10th May, 2024 : Vawiin khan Trained Nurses Association of India, Lunglei District Branch buatsaihin Convention Center-ah International Nurses Day 2024 hman a ni. Pu James Miahlung, Addl. Deputy Commissioner, Lunglei chuan khuallian niin a hmanpui. Kumin thupui atan hian “Our Nurses, Our Future, The Economic Power of Care " tih chu hman a ni.

He hun hi Pi C. Rothangpuii, Principal, Nursing School Lunglei in kaihruaiin,  Pu James Miahlung chuan Nurse te hi mahni mihringpuite rawngbawl saktu, khawtlang tan a mi tangkai an ni a, Pathian rawngbawlna pawimawh tak thawktu an nih bakah tlawmngaihna leh dawhtheihna nen damlo an enkawl thin chu ropui hle a ni, a ti. Damdawiin a damlo lo dawnsawn dan leh enkawlnaah mipuiin an lo dahsan thin angin; Missionary rilru pu chunga damlo te lo dawngsawng a lo enkawl turin a chah a. Tunlai thiamna mila an rawngbawl sak te,  tun aia tha a enkawl dan te a awm em tih ngaihtuah chung a zirbelh zel turin a chah a, Nurse te dinhmun hi engtin nge kan chawi san ang tih ngaihtuah chunga tun aia an role hi play thiam tur leh midang te tan a malsawmna ni theuh turin a chah bawk.

Pi C. Lalruatfeli, Tutor Nursing School Lunglei chuan theme presentation pein; kumtin hian Florence Nightingale piancham hriatrengna atan May 12 hian International Nurses Day pual bik hi hman thin a. Kumin International Nurse Day hi Sunday a nih avangin vawiinah he hun hi hman a ni, a ti.  Health sector a Nurse te thawhhlawkzia lawmna hun tha tak a ni a, Nurse te hi medical field a sulsutu ber anga ngaih an ni. Khawvel ram 138 in he ni hi an zawm a, WHO chuan mi 1000-ah Nurse pathum zel an awm tura ngaih a ni. Khawvelah Nurse maktaduai 27.9 awm anga ngaih a ni. Nurse te intohdelh theih dan bakah Public Sector, Private sector leh Foreign thleng a hnawthawh theih dan te a sawi bakah tunlai thiamna mil zela in tuaithar zel angaih thu a sawi bawk.

Vawiin hun hmanah hian Pi T. Lalnipuii, Chairman, Trained Nurses Association of India, Lunglei District Branch pawh in thu a sawi a, Nursing School Lunglei, Nursing School Serkawn, Civil Hospital, Christian Hospital, Serkawn, Hope Hospital leh Faith Hospital Lunglei ten special item hrang hrang an entir a. He hun hi Nurse retired te pawn an hmanpui a ni.