Vawiin khan Circuit House Conference Hall Lunglei-ah KVK  Lunglei District, Hnahthial chuan Scientific Advisory Committee Meeting neiin Dr. H. Saithantluanga Director of Agriculture (R&E) & Chairman,  Scientific Advisory Committee Mizoram Aizawl in a kaihruai a ni. 

SAC Chairman Pu Saithantluanga chuan KVK Lunglei District Scientific Advisory  Committee Vawi 8-na neih theih a ni chu lawmawm a tih thu sawiin, he huna tel Department hrang hrang aiawh te pawhin an thiamna leh ngaihtuahna te chu KVK hmanga kuthnathawktute chhawmdawlna kawngah tangkai taka an hman a beisei thu a sawi. SAC Chairman chuan SAC chu KVK te kalphung leh an hmalakna te enpui tu leh a hnathawh dan tur ruahmanna siampui tu a ni tiin, Mizoram District pariat ah KVK din a nih tawh thu leh KVK chu Kuthnathawktu te chawikanna kawngah thawh hlawk tak an nih thu a sawi bawk. 

Dr. Lalmuanzovi Sr, Scientist KVK Lunglei pawhin thu sawiin, Scientific Advisory Committee tello chuan KVK chu engmah an nih loh thu leh SAC chu KVK hnathawh dan tur kawhhmuh tu leh Action Plan an siam te endik a pawmpui tu an nih mai bakah KVK hnathawh tha tawklo te siamthat dan tur kawhhmuh tu an ni tiin, Kum 2018- 2019 chhunga KVK Lunglei in Action Plan an bawhzui dan hrang hrang te leh Kum 2019- 2020 atana Action Plan an neih te Power Point Presentation hmangin kalkhawm te a hrilhfiah a, hei bakah hian KVK Lungleia thawktu Scientist Pali ten Thlai chingtu te leh Ranvulhtu ten hmasawnna nasa zawk an neih theihna tura KVK Lunglei District hmalakna kawng hrang hrang an sawifiah bawk a ni. 

Vawiina KVK Lunglei District Advisory Committee ah hian Lunglei khawpui chhunga Sawrkar Department hrang hrang aiawh te telin an Department leh KVK ten kuthnathawktute tana hma an lak ho theihna tur kawng hrang hrang te an sawiho bawk a ni.