Vawiin chawhma khan 2nd Khelo India Youth Games, 2019 a Medal dawng mi 47 hnenah Sports & Youth Affairs Minister Pu Robert Romawia Royte chuan Assembly Conference Hall-ah lawmpuina a hlan a, Lunglei South Bialtu MLA, Pu K.Pachhunga chuan a telpui a ni. He hun hi Pu Zothanmawia, State Nodal Officer, Khelo India Youth Game 2019 chuan a kaihruaiin, he huna tel zawng zawngte hi a lo lawm a ni.

Sports & Youth Affairs Minister Pu Robert Romawia Royte chuan thu sawiin, 2nd Khelo India Youth Games, 2019-a Medal dawngtute zawng zawng leh anmahni hruaitute a lawmpui a. Khelo Youth Games-a medal dawngtute hlawhtlinna hian hlawhtlingna dang rawn thlen ngei se, a ti a. Mizorama infiam mite hlawhtlinna avang hian sawrkar pawhin policy thar a nei dawn a ni, tiin a sawi a. Inkhel miten sports hrang hrang khello a, thiamna bikna nei tura an beih chuan, hlawhtlinna sang zawk neih a ni ang, a ti a. Minister chuan Mizo tlangval, Olympic Medallist Jeremy Lalrinnunga chu chhuanawm a ti a, Mizoram sawrkarin lawmpui nan Rs Nuai 15 a pe ang, tiin a sawi a. India ram huapa Mizo Nula Hockey khel thiam Lalremsiami pawhin Asian Games leh Youth Olympic-ah Medal pahnih a lak avangin Rs Nuai 20 pek a ni ang, a ti bawk a ni. Mizo te hi hnam fit ber leh Aizawl khawpui hi in fiam uar berna (City of Sports)-ah infiam mite hian an siam thei a ni, tiin a sawi a. Medal dawngtute zawng zawngte leh infiam mite chu nasa leh zuala tan la turin leh midangte entawntlaka awmturin a ngen a ni.

2nd Khello India Youth Games, 2019 hi Pune, Maharastra-ah 9th – 20th January inkara neih a ni a. Mizoram atangin infiam mi 114 leh team officials 24 an kal a. States leh UT atanga tel hi 36 niin, Mizoram chuan Medal 13; Gold 4, Silver 4, Bronze 5 lain, 16th Rank a ni a, state te zingah Manipur tih loh-ah chuan Medal la hnem ber a ni. Khello India Youth Games-ah hian infiam mi 7000 chuang an tel a ni.

He hunah hian Sports & Youth Services Department, sports association hrang hrangte hruaitute,  medal dawngtu nu leh pa te leh midangte an tel a ni.

Attachment

  • Loading attachment...