Vawiin chawhma dar 10:30 khan Lunglei DC Indoor Stadium-ah ni 2 awh tur Roll Revision Training for Block Level Officer’s leh Designated Officers te tan neih a ni. Training hawnna inkhawm  Dr. Andrew H. Vanlaldika, Election officer kaihhruaina hnuaiah Pu V. Sapchhunga IAS, DC Lunglei chuan a hawng. DC chuan thusawiin Democracy  ramah chuan inthlanna hi a pawimawh hle a, chuvangin inthlanna fel fai nei tur chuan Roll Revision hi a pawimawh a ni. Revision ah hian dan anga hna kan thawh pawhin beih kan tawk thin a, mahse Election Commission Guideline anga uluk taka kan thawh chuan kan him ang a ti. Kum tling tawh roll a thun luh chu tih ngei ngei tur a nih thu sawiin, dik lo taka roll a thun lut lo turin a chah bawk.

Lunglei  Dist chu District dangte entawn tlak a thawk turin training a kalkhawm te chu D.C hian a chah a, Election Commission of India chuan BLO leh D.O te hi hna zahawm ah a ngai a ni a ti. Job Card leh Ration Card dik lo tam lutuk chuan buaina tam tak a thlen thu D.C hian sawi bawkin, Sorkar-in a dik lo chhui chhuah hna hi a thawk mek a ni a ti bawk. Pu R. Vanrengpuia, SDC/AERO leh Pu David Lalrinawma SDC ten training hi  an pe a ni.