Pianphunga rualbanlo te hamthatna leh an chanvo humhalhna chung chang zirhona Lunglei DC leh Social Welfare Department Lunglei te buatsaih chu vawiin khan Heritage Centre Lunglei ah neih a ni.

He hun hi District Social Welfare Officer Pi F. Lalngaihawmin a kaihruai a, Lungleia sawrkar Department hrang hrang aiawh leh Tlawmngai pawl hrang hrang aiawh bakah Lunglei MJA te an tel a ni. He huna zirtirna petu  Pi Chuauzikpuii chuan thu hma sawiin rualbanlote chung chang hi India sawrkar in a ngai pawimawh em em a, anmahni enkawlna chungchanga dan awmsa te pawh ennawnin a siam tha a, khawtlangah thliar bik an nih lohna turte, mi pangngaite nen chanvo inang reng an neih dan leh hmuhsit leh endawng theih bik an nih lohna dante hi uar zawka kan puan chhuah a tul hle a ni a ti.

Rualbanlote tana dan siam thar The Rights of Peoples with Disability Act 2016 chungchang Pi Chuauzikpuii hian a zirtir a, Rualbanlote zalenna, an dikna leh chanvo atana Sawrkarin hma a laksak theih dan leh an mamawh ang an hmuh theih nana khawtlang mawhphurhna chung changte zir ho a ni bawk. He traininga kalte hian Rualbanlote chanvo leh dikna hi anmahni thawhna Office, khua leh vengah a tul angin an zirtir chhawng leh dawn a ni.