Vawiin khan SSA Mission, Lunglei District hnuaia Girls’ Hostel sak zawh thar chu Sports Minister Pu Zodintluanga’n a hawng a. SSA Girls’ Hostel hawnna inkhawm hi a bul chiah Electric Veng Govt. Middle School Compound-ah neih a ni a, Lunglei District SSA Mission DPC Pu R.Laldawngliana’n a kaihruai a ni.

Hostel hawnna inkhawmah Khuallian Pu Zodintluanga chuan thu sawiin sorkarin Lunglei District hmasawnna atan tan a lak mek zingah vawiina BPL chhungkua atanga hmeichhe naupang zirlaite tan SSA Girls’ Hostel tha tak neih theih a ni ta chu a lawmawm hle a ni, a ti a. Khawpui naupangte aiin thingtlang naupangte thiam lo zawk tura ngaih hi a dik lova, thluak neihdan inchen reng mahse zirna tha leh awlsam zawka an banphakah a awm ngai loh vang zawk a ni, a ti bawk. Kum 4 leh chanve kal ta chhunga sorkar hmalaknain Lunglei District huamchhungah Primary School 3, UPS 35 leh High School 17 thar hawn a nih bakah school building 34 te chu thuamthat niin SSA hnuaiah zirtirtu mi 400 zet lakbelh a ni tawh thu Minister chuan a tarlang a. Sports & Youth Services hmalaknain Lunglei-ah Gallery leh athletic track changtlung tak awmna Stadium puitling sakna tur Cheng vaibelchhe 22 chu sorkar laipuiin a phalsak tawh a ni, a ti a. Contact Sports practice-na tur leh District/State Level intihsiakna thleng nghal theihna tur hmun tha tak din sak tum a nih thu a sawi bawk. ICT Department hnuaiah hmun kilkhawr zawka awmte tan office pan buai ngai lova Birth Certificate leh lehkha pawimawh dangte awlsam zawka an lakchhuah theihna tur ‘Rural Information Kiosk’ engemawzat hawn tum a ni tih a sawi bawk. Minister hian SSA bultuma Lunglei District chhunga Middle School 28 hnena pek tur Computer Set 1 leh Laptop 1 a hlan nghal a ni.

SSA District Project Coordinator (DPC) Pu R.Laldawngliana Building Report-ah chuan SSA Girls’ Hostel sak nan cheng nuai 20 hman a ni a. DPC hian rampum huapa Right to Education hnuaiah kum 2015 atangin zirtirtu trained lo chu lak a nih tawh loh tur thu a sawi a. SSA hnuaiah hian Lunglei District huamchhunga school hrang hrang 82 hnenah Computer leh laptop pek vek tum a nih thu a sawi bawk a ni.

Vawiina hawn tak SSA Girls’ Hostel-ah hian Lunglei District huamchhunga khaw 18 atanga thlanchhuah BPL chhungkua ami hmeichhe zirlai naupang 50 lai enkawl mek a ni a.

He Hostel-ah hian Dormitory 2 bakah Choka leh Study Hall te a awm a. Hostel enkawl tur hian Coordinator 1, Warden 2, Chowkider 1, Night Guard 1 leh Cook 1 an awm a ni.

Attachment

  • Loading attachment...