Association for Voluntary Blood Donation Lunglei huaihawtin Lungleiah pawh Valentines Day puala Thisen pek runpui Lunglei Government College Multipurpose Hall ah vawiin khan hman a ni.

He ni puala hun hman hi Lunglei AVBD Vice President Pu Lalrammuana Chawngthu in a kaihruai a, Lunglei Government College Principal Pu LH Rothanga chuan Valentines Day pual thuchah tawi sawiin hmangaihte tana hmangaihna lantirna ni a nih rualin hmangaih nei hranpa lote pawhin midangte tana thil hlu tak thisen kan hlan theihna Ni a ni hi  a ropui leh zual hle a ni a ti a,  ruihhlo leh mipat hmeichhiatna hman sual avanga thisen pawh test ngam tawh lo tam tak an awm laiin thalai thianghlim tak tak ten he ni a mi chanhai leh a mamawhtute tana thisen pe tura in inlan thei hi a ropui hle a ni a ti.

Valentines Day puala thisen pek runpui hunah hian Dr. S.R. Ngurchamliana President AVBD Lunglei pawhin thisen pek hlutna leh a pawimawh zia chung chang a sawi bawk.

Thisen pek runpuiah hian Lungleia Zirna in hrang hranga zirlai te bakah mi tlawmngai engemawt in thisen Unit 104 an pe a, a petute hi mipa 85 leh hmeichhia 19 an ni.