Vawiin khan YMA Sub Hqrs Conference Hall-ah William Shakespeare kutchhuak ‘Much Ado About Nothing’ Mizo tawnga lehlin hmasak ber Lalremliana Pachuau buatsaih chu Lunglei DIPRO Pi C. Lalremruati’n a tlangzarh. Tlangzarh inkhawm ah hian Rev H. Killuaia’n hunserh hmangin sawrkar official, Lunglei MJA leh thu leh hla lama tui mi te an kalkhawm a ni.

Lehkhabu tlangzarhtu Pi C. Lalremruati chuan thu sawiin khawvela thu leh hla thiam ber an tih fo thin William Shakespeare kutchhuak ‘Much Ado About Nothing’ mizo tawng a chhiar theih tura buatsaih a ni ta hi a lawmawm hle a, thu leh hla ngaina mi ka lo nih ve angin he lehkhabu tlangzarhtu nih hi a ropuiin a hlu zual hle a ni a ti a. Lehkhabu buatsaihtu Lalremliana Pachuau thiamna leh taimakna chu fakawm a tih thu sawiin a lehkhabu lehlinah hian mizo tawng a ziak ulukin a fimkhur a, hei hian a hlutna a tizual hle a ni a ti a. Tunlai khawvel thiamna sang zelah technology a thang chak em em a, social media a chak bawk si a hei hian lehkhaziak chhiar taimak kawngah nasa takin min tihnufum ta a, zirlaite leh mipui mimir hian lehkha chhiar hi kan uar thar leh a ngai a ni, a ti bawk.

Vawiina Lehkhabu tlangzarhna hunah hian MJA Lunglei General Secretary leh MAL Asst Secretary ni bawk Pu V. Rokhawlkima'n lehkhabu thlirlawkna (Preview) hun a hmang a. Lungleia Ziakmi C. Lalhruaitluanga, TC. Jonunsanga, ZD Lalthlamuana te bakah a duh apiangin thusawina hun hmangin lehkhabu buatsaihtu Lalremliana Pachuau in lawmthu sawiin hun a khar a ni.

Vawiin lehkhabu tlangzarh ‘Much Ado About Nothing’ hi phek 192 niin a man hi Rs. 150/- a ni a.  Gilzom Offset, Electric Veng Aizawl a print niin Synod Bookroom-ah te leitur in a awm a ni. Lehkhabu buatsaihtu Lalremliana Pachuau hi Venglai, Lunglei ah chengin  Mizo thu leh hla khawvel ah chuan hriat hlawh tak a ni a. Vawiina lehkhabu tlangzarh hi a lehkhabu pahnihna niin a lehkhabu ziah ‘Ka Hlimthla’ tih chu  kum 2017 khan alo ti chhuak tawh a. Tun dinhmunah William Shakespeare a thu ziak dangte letlingin lehkahbu dang te pawh ti chhuak turin hma a la mek a ni.