Khawvel ram hrang hranga tualchhuak hnamte hmakhua ngaihtuah-in UNO chuan kum 1994 atang khan August ni 9 chu 'World Indigenous People's Day' atan a puang ta a, he Ni hi kum tin UNO hmunpui Geneva bakah a remchang ang zelin hmun dangah te hman a ni thin a ni. Mizoramah pawh vawiin khan Zo-Reunification Organisation (ZoRO) huaihawtin Saikuti Hall, Lunglei-ah he Ni puala inkhawm leh lawmna neih a ni a, Social Welfare Minister Pu PC Lalthanliana chu Khuallian a ni.

Vawiina 'World Indigenous People's Day' pual inkhawm President, ZoRO Division Hqrs. Lunglei Pu Eric Zomuanpuia kaihhruaiah Khuallian Pu P.C. Lalthanliana chuan he Ni lawm tura kalkhawm zinga a tam zawk chu thalai an nih chu a lawmawm a tih thu sawiin Mizo ram leh hnamin a thlen tur a thlen tak tak theih nan chuan thalai an pawimawh ber a ni, a ti. Mizo hnamin vawiina kan mamawh ber chu tanrualna a ni a, kan ram politics kaldanah pawh hian heng thil 3 - ram, hnam leh sakhua - te hi an him tur a ni a; enge ram kalphungin heng thil 3 chungah nghawng a nei tih enfiah a, lungawithlak kan tih leh tih lo kan inennawn fo a tul a ni, a ti bawk. Mizote hlawhtlinna ram tak tak thlenpui turin thalaitean inbuatsaih tak zet a hun ta tiin Pu P.C. Lalthanliana chuan Pathian thuin a sawi angin Zohnathlakte inkarah inhmangaih tawnna a awm zel theih nan duhsakna a hlan a ni.

'World Indigenous People's Day' pual inkhawmah hian Khuallian Social Minister Pu P.C. Lalthanliana chuan UNO Flag a pawtparh a; ZoRO President Pu R.Thanmawia chuan ZoRO Flag a pawtpharh ve thung a. Mizo Lal hmasate leh Mizoram tana nunna hlu tak hlan tute hriatreng nan Sunna hun hman a ni bawk. He Ni lawm nan hian Mizo hnam lam, zai leh hnamziarang lanna theihna thil hrang hrang phochhuah a ni bawk a ni.

World Indigenous People's Day' lawmna inkhawm chhim tur hian Mizoram hmundang te leh a chhehvel state hrang hrang atangin Zohnathlak aiawh engemawzat an lo kal a; chung zinga chuan Singphu Development Society, Arunachal Pradesh; Northern Zone, Manipur; Western Zone, Tripura leh Chittagong Hills Tract atangin palai thahnem tak an tel a ni. Heng bakah hian ZoRO Headquarters, Aizawl atangin an President Pu R.Thangmawia te nupa bakah Pu R.Sangkawia leh Pu Malsawma Colney te pawh an tel a ni.