New Delhi a cham mek Minister Pu John Rotluangliana chuan vawiin khan DoNER Minister General V.K. Singh leh DoNER Secretary Shri Rajiv Tharu-te chu hmuin, a department chan zinga pahnih - Transport leh FCS&CA Department hnuaia project pawimawh chungchangte a sawipui.

Minister Pu John Rotluangliana hian DoNER Minister hi a office-ah hmu in, Lumding – Badarpur – Silchar leh Bairabi inkar Rel kawng tihlen tum avanga Mega Block awm tur chungchang leh, hemi avanga Mizoramin harsatna a tawh theih pumpelh nan Visakhapatnam atanga Bay of Bengal tuipui, Bangladesh leh Agartala kaltlanga buhfai leh eitur dang lakluh theih dan tur a sawipui a ni.

DoNER Secretary Shri Rajiv Tharu hnenah hian Pu John Rotluangliana chuan District Transport Office, Staff Quarters leh Civil Supplies Godown sak leh hung chungchang te, Loading Shed leh Weighbridge siam chungchang leh Department hmalakna pawimawh dangte a thlen bawk.

Minister Pu John Rotluangliana hian August ni 11, Thawhtanni hian Ramvilas Paswan, Union Minister, Consumer Affairs, Food and Public Distribution chu a office-ah hmu leh tur a ruahman a ni.