59/2023-2024

LUNGLEI THE 9^TH APRIL 2023 - Lunglei DC, Pi Ramdinliani, IAS chuan nimin April ni 8, 2023 khan NH - 54 kawng laihzau hnathawh chu a hmuna tlawhin, he project hnuaia package 6 huamchhunga khua Tawipui N-I leh N-II, Tawipui S leh Thingfal ah kalin, hna kal mek en pahin compensation la tawh, an in leh lo la chhuahsan duhlo te chu a hmunah ngei ram chhuahsan tura hriattirna (Eviction Notice) a pe.

He Spot Verification ah hian Settlement Officer, Lunglei District Pu Alan Lalthanzara, leh LR&S Surveyors bakah contractor ABCI leh NHIDCL engineer te chuan DC an tawiawm a. Hmun hrang hrangah khua VC te nen kawng laih hnathawh hi en hovin, harsatna awm te sut kian dan tur te an rel nghal a ni.

NH-54 Project hi JICA funded niin, kawng zauh avanga mi ram a sut chhiat turte hi The National Highways Act, 1956 hnuaia lak niin, in leh lo chhiat man compensation hi Central dan ‘Right to Fair Compensation and Transparency in Land Acquisition, Rehabilitation and Resettlement Act, 2013’ (RFCTLARR Act 2013) hmanga kum 2019 atanga pek an ni tawh a. Ram chhe vek tur leh hmun danga insawn ngai te chu compensation bakah relief & rehabilitation (R&R) chhawmdawlna pek an ni tawh bawk a. Heti chung hian la chhuak duhlo an awm nual avangin hmun tam takah kawng laih leh zauh hnathawk an ti sukuk a, ram chhuahsan tura hriattirna hi vawi 2 DC Lunglei in chhuah tawh mahse thupek zawm duhlo an la awm fo avangin mimal hnenah kal chilha pek leh ngei an ni. Lehkha pek an nih atanga ni 15 hun pek an ni a, he hun tiam chhunga an la chhuak duhlo anih chuan in sawnchhuah luih tir (forceful eviction) kalpui ani ang tih thupek chuan a sawi.

Eviction Notice hi Tawipui N II ah 6, Tawipui S ah 18, Thingfal 32 ah pek a ni phawt a, Lunglei (leh Hnahthial) District a package danga chhuak duhlo te pawh mimal hnenah pek vat tur an ni tih Lunglei DC chuan a sawi bawk.