58/2023-2024

Mamit 8th April, 2023 : April Ni 6, Ningani khan Mamit Constituency MLA Cup 2023 chu Lengpui Sports Complex-ah zawh fel niin kharna inkhawm tawi buatsaihah Bialtu MLA leh Road & Infrastructure Development Board Vice Chairman ni bawk Er. H Lalzirliana chuan hun a hmanpui.

Bialtu MLA chuan thu sawiin Mizoram Sorkarin Sports lama hmalakna chak taka a kalpui mekna-ah, a malsawmna dawngtu zinga Mamit Constituency a tel ve chu a lawmawm takzet a ni a ti a. MLA Cup 2023 chu infiammite tana bultanna rahbi a nih thu leh rampum huap inelna hrang hrangah hmasawn zel turin theihtawp chhuah a nih tur thu a sawi. National level thlenga tel ve thei turin Mamit Constituency chhunga thalaite chuan theihna an neih thu leh theihtawpchhuaha thawh hona nei zel turin infiammite a chah bawk. 

MLA Cup 2023 a hlawhtlinna tur atana mi inpe zawng zawngte chungah lawmthu a sawi bawk a ni.

Mamit Constituency MLA Cup hi March Ni 24 zan khan Kick Off niin Team 23 an tel a. Final Match-ah hian Lengpui G&SA Red Team leh Blue Team-te inhmachhawnin, Red Team te hian sithum faia hnehna changin, champion nomawi leh ₹ 70000/- an hawn a. Runners up Blue team-te hian pawisa fai ₹ 40,000/- an hawn bawk.

Mamit Constituency MLA Cup 2023 kharna inkhawm hi Tv. Joel Lalramdinmawia Organising Secretary chuan kaihruaiin Pu Rohmingthanga, President G&SA Lengpui chuan lawmthu sawina a nei bawk a ni.

Attachment

  • Loading attachment...