57/2023-2024

Champhai, the 8th April, 2023: Northeast Initiative Development Agency (NEIDA) buatsaihin vawiin chawhma dar 10:30 khan NABARD bultum Tribal Development Fund (TDF5) hnuaia Khawbung RD block huam chhunga Apple chingtu, Tuipuiral Apple Growers Co-operative Society Ltd. member-te chu Champhai Vengthlang YMA Run-ah Co-operative Society inenkawl dan, 'Co-operative Society Management' chungchang zirtir an ni.

He hunah hian Pu C.Vanlalhruaia, Co-operative Audit Officer chuan Co-operative Society-te inrelbawl dan tur leh kuthnathawktute tharchhuah tihralna thlenga a pawimawh dante a sawifiah a. Pi H.Lalhmachhuani, District Development Manager (DDM), NABARD Champhai pawhin NABARD hnuaia FPO te tana hamthatna dawn theih hrang hrangte a zirtir bawk.

NEIDA (Northeast Initiative Development Agency) chuan kum 2020 atang khan Tata Trusts leh Development Finance Institution hrang hrangte kaltlangin Champhai District loneitu leh mirethei zawkte chawikan hna an thawk tan a. Tata Trusts bultum Integrated Livelihood Promotion (ILP) hnuaiah hian Khawbung RD block chhunga khaw 6 a loneitu 352 te tan Vaimim leh Chana chin hna an lo kalpui tawh a; he project-ah hian AH&Vety. Department nen tangkawpin loneitute thar chhuah Vaimim quintal 612, cheng nuai 12 man hu an lei sak bawk a ni. 

NEIDA hian Champhai leh Khawzawl District chhunga khaw 41 tan Springshed Management hna an thawk dawn bawk a; he project kaltlang hian tuihna chak tawhlo leh kang chat tawhte tihnun thar leh nan groundwater recharge hna an thawk dawn a a. An tarlan danin NABARD (National Bank for Agriculture and Rural Development) nena thawhhona Farm Sector Promotion Fund (FSPF) hnuaiah hian Ruantlang loneitute tan Zikhlum leh Chana chin hna an buaipui a, Horticulture Department nen pawh an thawkho mek bawk a ni. Heng bakah hian NABARD project hnuaiah hian Tribal Development Fund (TDF6) hnuaiah Khawzawl District chhunga khaw paliahte Dragon Fruit chin hna kalpui turin hma an la dawn bawk a ni. NEIDA hian hma an lakna hmunahte hian thlai tui pek tur a lo hnianghnar zawk nan Diversion Based Irrigation hmangin tuilakna turte an buaipui sak thin bawk a ni.

Khawbung RD huam chhunga Apple chingtute hi NEIDA leh NABARD tanpuinain Central Sector Scheme 10,000 FPO hnuaiah Tuipuiral Apple Growers Co-operative Society Limited tia ziahluh an ni.