1767/2024-2025

2024 Thlazing ni 27: Power Grid Corporation of India Limited (PGCIL) te'n Corporate Social Responsibility (CSR) kal tlanga Lungsen-I Village Council (VC) tana bawlhhlawh paihna tur lirthei (Mahindra Bolero Maxx Pik-Up) an pek chu vawiin chhun dar 12:00 khan Lunglei District Bawrhsap Pu R. Lalṭhazuala chuan Lunglei DC Office kawtah Lungsen-I VC President Pu C. Lalremruata kutah a hlan.

Lirthei hlanna hunah hian PGCIL General Manager Er Hrangchhuana Sailo chuan Lungsen-I Village Council te'n thianghlimna kawnga an mamawh tak, bawlhhlawh paihna tur CSR kal tlanga an ngaihtuahsak thei chu lawmawm a tih thu leh ṭangkai taka an hman a beisei thu a sawi a. A hlawhtlinna atana Lunglei DC-in a puihna zawng zawng bakah, khawtlang hruaitute kutah DC ngeiin a hlansak thei chu lawmawm a tih thu sawiin, lirthei chabi leh lehkha pawimawh (document) te chu Lunglei DC kutah hian a hlan hmasa a ni.

Hemi hnu hian Lunglei DC Pu R. Lalṭhazuala chuan Lungsen-I VCP Pu C. Lalremruata kutah lirthei chabi leh document-te hi a hlan chhawng ve nghal a. Lirthei thar chu Lungsen-I khawtlangin khawtlang thianghlimna kawngah ṭangkai taka an hman a duh thu leh khawtlang faina leh thianghlimna tura bawlhhlawh paih kawnga khawtlang harsatna pawh a sut kian ngei a beisei thu a sawi a. Lirthei ngaihtuahsaktu PGCIL te chungah lawm thu a sawi bawk a ni.