2325/2024-2025

2024 Khuangchawi thla ni 1: Lunglei khawpuia a hmasa ber atan Lunglei Chanmari kawngpui phei, KFC dawr zawn aṭanga Civil Hospital Lunglei bul kawng chung lei dawh (overbridge) thleng chu bawlhhlawh paih lohna hmun (Lunglei No Littering Zone 1.0) atan vawiin chawhnu dar 1:00 khan Lunglei District Bawrhsap Pu R. Lalṭhazuala chuan a puang.

Bawrhsap Pu R. Lalṭhazuala chuan sawrkar laipui leh state sawrkarin kum tin India hnam pa Mahatma Gandhi pian champha phak puala faina beihpui a kalpui ṭhin angin kuminah pawh Swachhata Hi Seva kalpui niin, khawpui chhungah UD&PA hma lakna leh thingtlang lamah PHE Department hma laknain faina beihpui thlak kalpui mek a ni tih a sawi a. Khawpuiin faina leh thianghlimna kawnga hma a sawnna tura hma lakna pawimawh tak, bawlhhlawh paih lohna hmun ruahman a ni chu lawmawm a tih thu sawiin, District pum pui faina kawnga hma hruaitu leh ṭhan harhtirtu a nih ngei a beisei thu a sawi a. Faina chu mimal aṭangin chhungkuaah, khawtlangah leh ram pumah inkhai diat chho zel a nih thu sawiin, Lungleia bawlhhlawh paih lohna hmun puan pawh chu a kenkawh, en zui leh hlawhtlinna tur chu mi tin mawhphurhna a ni tih a sawi a. LMC, sawrkar department, khawtlang hruaitu, tlawmngai pawl, veng neitute leh mipui veivakte chu a hlawhtlinna tura ke pen ṭheuh turin a sawmin a chah nghal a ni.

Bawlhhlawh paih lohna hmun puan inkhawm tawi hi Lunglei District Urban Developement Officer Pu C. Sawihlira chuan kaihruaiin, Clean Lunglei Chief Organiser Pu C. Lalhmingmuana'n NLZ puang tura hma lakna report a pe a. Chanmari Local Council Chairman Pu C. Ralliana chuan NLZ hlawhtlinna tura Chanmari vengin theih tawp an chhuah tur thu sawiin, mipuite thlawpna leh thawhpuina a ngen nghal bawk.

Lungleia bawlhhlawh paih lohna hmun puan hmasak ber hi Urban Development & Poverty Alleviation (UD&PA) Department Lunglei leh Clean Lunglei te bul tuma ruahman niin, LMC Ward VII Committee, Local Council Chanmari, YMA, MHIP leh MUP Chanmari Branch te nena thawh hona a ni a. Bawlhhlawh paih lohna hmuna puan hi Lunglei khawpui hmun lun lai tak pakhat, Civil Hospital Lunglei te, Government Higher Secondary School Lunglei te, Lunglei Park leh bazar hmun te awmna lai bawr niin, bawlhhlawh paih lohna hmuna puan tak hian sikul chhehvel bakah vantlang kawngpui metre 150 vela thui, chhim lamah KFC dawr leh hmar lamah Civil Hospital thleng a huam a ni.

Bawlhhlawh paih lohna hmun puanna inkhawmah hian Govt HSS Lunglei, Govt HS Lunglei leh Leitlangpui HSS zirlaite leh zirtirtute, UD&PA-a thawktute, Clean Lunglei te, District MJA te leh Chanmari khawtlang leh NGO hruaitute an tel a. Hun hman zawh hian kawng dunga bawlhhlawh chhar fai nghal niin, UD&PA leh Clean Lunglei te chuan kawng dungah bawlhhlawh paih phal loh chungchang hriattirna pawimawh an tar bakah in tinah ngenna lehkha an sem nghal bawk.

Attachment

  • Loading attachment...