2324/2024-2025
October ni 1, 2024: Minister Pu Lalnghinglova Hmar chu vawiin khan Ministry of Skill Development & Entrepreneurship (MSDE) leh Indian Institute of Entrepreneurship (IIE), Guwahati tangkawpin a buatsaih “Northeast Skill & Entrepreneurship Conclave, 2024”, Indian Institute of Management (IIM) Auditorium, Shillong-ah neih ah a tel. He hunah hian Pu Jayant Chaudhary, Minister of State (Independent Charge), Ministry of Skill Development & Entrepreneurship (MSDE) chu khuallian niin, Northeast state hrang hranga Skill & Entrepreneurship changtu Minister te chu khualzahawm an ni. Conclave-ah hian Mizoram Minister chu Labour, Employment, Skill Development & Entrepreneurship (LESDE) Department Secretary Pu Lalmalsawma Pachuau chuan a tawiawm a ni.
LESDE Minister Pu Lalnghinglova Hmar chuan Mizo thalaite’n infiamna, music, hospitality, beauty & wellness, service leh thildangah eizawnna tling thiamna leh theihna (skill) an nei tih a sawi a. Sawrkar laipui hnuaia skill development scheme ah te India ram pum hrut rual lovin, Mizoram leh Northeast thalaite tuina leh thiam zawng mila kalpui a pawimawh thu a sawi a. State te chu an thalai leh mipuite azira job role thlang a, kalpui turin zalenna zau zawk pek nise tiin a rawt a ni. Northeast thalaite’n theihna sang tak an nei a. An theihna tihmasawn a, hlawhtlinna tluantling an neih theihna’n Northeast-ah Skill Training Centre changtlung neih belh pawimawh a tih thu a sawi bawk.
Pu Lalnghinglova Hmar chuan Mizo thalai engemawzatin Sports chu eizawnna’n an hmang mek tih entirna pe in, sports chu intihhlimna mai ni lo, eizawnna tling skill pawimawh leh thawhhlawk tak a ni tawh tih a sawi. India in Olympic 2036 thlen a tum avangin, infiammite leh sports kaihhnawiha awmte hmasawnna’n tun atangin skilling ngaihpawimawh a ngai tih a sawi a ni.
LESDE Secretary Pu Lalmalsawma Pachuau chuan Mizoram aiawhin Powerpoint Presentation a pe a. Mizo thalaite’n kut themthiam kawngah theihna sang tak an nei a. Kumin kumtira IndiaSkills Competition neihah Mizoramin Medal pali leh Medallion of Excellence pali a la a, medal leh medallion latu zinga panga te chu ITI leh Women Polytechnic chhuak an ni tih a tarlang.
Pu Lalmalsawma Pachuau chuan Skill Development leh Entrepreneurship a hmasawn turin Industry hrang hrangte nen thawhhona tha tak a awm tih a tarlang a. LESDE Department in skill development scheme hrang hrang a kalpui mek a. Kum 2023 ah Aizawlah Mega job fair buatsaihin thalai engemawzatin hna an hmuh phah a. Entrepreneur te tana intihsiakna PUM te, ITI chhuakte tana intihsiakna leh tanpuia Kawtchhuah te buatsaih thin a nih thu a tarlang bawk. Planning & Programme Implementation Dept. Pawhin Mizoram Startup Mission kaltlangin entrepreneur te tanpuina tur Mizoram RAHBI a kalpui mek a. Mizoram Sawrkar flagship scheme Bana kaih (Handholding support) pawh mahni ke a din tumte tanpuina lam hawi niin, mahni ke a din tum entrepreneur te chawikang turin Mizoram Sawrkarin chak takin hma a la mek tih a tarlang a ni.
He Conclave-a khuallian Pu Jayant Chaudhary, Union Minister for MSDE chuan India chu ram zau tak, a mi chengte pawh inang lo tak tak kan nih avangin Skill Development & Entrepreneurship pawh State te nen inrâwn chunga kalpui a ngai tih a sawi a. Northeast State hrang hranga Skill Development & Entrepreneurship Minister leh official te thathona, inpekna leh idea tha tak takte chu lawmawm a tiin, chona a pek thu a sawi a ni. Industrial Training Institute (ITI) te chu skill inzirtirna pawimawh tak an nih avangin India Sawrkar pawhin a ngaipawimawh a, ITI 1,000 tihchangtlunna tur kalpui mek a ni tih a tarlang bawk.
Sawrkar laipuiin Northeast India a ngaipawimawh a, Conclave chhunga rawtna hrang hrang lutte pawh tihhlawhtlin dan ngaihtuah a nih tur thu a sawi a. Mipui rilruah Skill pawimawhna tuh turin skill competition tam zawk buatsaih a, tun aia skill thiamte chawilâr thiam a pawimawh thu a sawi bawk a ni.
Union Minister hian Indian Institute of Entrepreneurship (IIE), Guwahati kaltlanga Northeast India-a Entrepreneurship Development Centres 30 din te chu a hawng nghal bawk.
Conclave-ah hian Pu Pritam Dutta, Director, MSDE chuan Powerpoint Presentation hmangin Northeast India a Ministry of Skill Development & Entrepreneurship hmalakna hrang hrangte a tarlang a. 'Skill Development and Entrepreneurship in Northeast Region' thupui hmangin video tawi thlirho a ni bawk. Northeast State pariat atangin an state theuha Skill Development leh Entrepreneurship dinhmun tlangpui leh hmathlir te an tarlang a ni.
Attachment
- Loading attachment...
