2323/2024-2025

Aizawl 1st October, 2024 : Vawiin khan Education Conference Hall, Directorate of School Education-ah zirbingna Report tlangzarhna leh Samagra Shiksha leh Institute of Advanced Studies in Education (IASE) te'n thawhhona thuthlung an ziahna programme neih niin Dr. Vanlalthlana, Department of School Education leh Higher & Technical Education Department Minister chu khuallian a ni. 

Khuallian chuan zirna lama kan ram mamawh em em zirbingna (Research) pawimawhzia sawiin vawiina Secondary School zirlai naupangte harsatna zirbingna hmanga report (Identification of Learning Problems of Secondary School Students In Mizoram) tlangzarh theiha chhawpchhuah a ni chu lawmawm a tih thu sawiin Mizoram Education Reforms Commission-in implement ngam tura kan intintuah a ngaih thu a sawi. Zirchianna atanga a lan danin school zirtirtu semrual loh avanga subject zirtirtu indaih lohna awm thin chu pawi tiin a theih chin chinah school leh zirtirtu data enchian a, semrual (rationalise) an tum thu sawiin khawtlang mipui leh nu leh pate pawhin an khaw school dinhmun chauh ngaihtuah lova, midang nena inkhaikhin thin turin a chah bawk a ni.

Minister chuan kan sorkar chhung hian data felfai tak hnutchhiah kan tum tiin kan ram zirna-in kan thatpuina tur a nih dawn phawt chuan beidawng lova hmalak zel an tum thu a sawi bawk. National Achievement Survey (NAS)-ah kan performance a that theih lohna chhan chu zirbing a, theihtawpa hmalak dan turah ngaihtuahna seng turin vawiina kalkhawmte chu a chah bakah report pekna lama tanlak a pawimawh thu a sawi bawk a ni. 

Zirbingna (Research) an neih dan report tarlan danin Zirna In 69-a District 11 a Zirlai 2983 te Questionnaire hmanga zawhna te hi chhantir an ni. 

Prof. Lallianzuali Fanai, Principal, IASE & Principal Investigator chuan Technical Report pein Pu Lalsangliana, State Project Director, Samagra Shiksha Mizoram chuan Keynote Address a pe a ni. 

He hun hi Pu David Lalthantluanga, Spl. Secretary, School Education Dept. chuan kaihruaiin Pu Chawngthantluanga, Deputy State Project Director, Samagra Shiksha Mizoram chuan lawmthu a sawi a. DIET, SCERT, IASE leh MBSE lama mithiamte bakah zirlai leh sawmbikte he hunah hian an tel a ni.