Vawiin chawhma dar 11:00 khan Lunglei Bawrhsap Pu V. Sapchhunga, IAS, hovin District Education Committee an thukhawm a, kumkalta chhunga SSA hmalakna te chhuichiang in kumin chhunga hmalakna tur hrang hrang ruahmanna an sawi ho.

Pu R.Laldawngliana DPC, SSA Lunglei District chuan kum liamta a SSA hmasawnna leh hmalakna thenkhat te tarlang in, Committee te pawmpui tur hmathar thenkhat a chhawpchhuak a, committee chuan Chakma Student Union in Tlabung area a Literacy Awareness Campaign leh enrollment campaign buatsaih nana sum a dilna chu, SSA  hmalakna nen a in an avangin, an pawmsak ta rih lo a ni.

He meeting ah hian school naupang 22270 te uniform leisak na tur Rs. Nuai 89.08, School leh Teachers Grant atan Rs. Nuai 11.68, Inclusive Education a hman tur Rs. Nuai 20.26 leh zirlaite hnen a a thlawn a lehkhabu sem tur lei nan Rs. Nuai 88.8 te chu pawm a ni. Civil Works Upper Primary School 35 leh Primary School 3 sakna atan a hman tur Rs. Nuai 1707.65 chu meeting chuan zirchiang in,  a pawmpui a bawk a ni. District Education Committee chuan Tlabung a SSA lehkhabu sem chungchanga thil chiang lo awm anga lang chu, chinfel tha a ti a. MZP hruaitu te pawhin an document kawl te chu Bawrhsap hnenah hian an hlan a ni.