Nimin chawhnu khan Lunglei Government College RUSA Multipurpose Hall –ah Lunglei DC, Pi Lalzarmawii, IAS chuan October ni 1 leh ni 7 inkar awh 63^rd National Wildlife Week, 2017 chu a hawng a. Kumin hian National Wildlife Week thupui atan “People’s Participation in Wildlife Conservation” – ‘Nungchate humhalhna kawnga mipui tel ve na’ tih hman a ni.  He hunah hian sawrkar official, tlawmngai pawl te, khawtlang hruaitute leh College zirlai thahnem tak an tel.

Pi Lalzarmawii chuan he hunah hian thu sawiin ramngaw leh nungchate humhalh kawngah mitin ten nasa taka tan kan lak a tul a ni tiin chhungkaw tinah naupan tet atanga kan in zirtir a tul a ni, a ti a. Khawvel changkang chho zelah hmawsawnna hna hrang hrang kal mek avangin kan ram ngaw kan ti chereu chak lutuk a, hmasawnna tluantling leh ngelnghet zawk kan neih theihna atan nungchate humhalh hi kan ngai pawimawh tel tur a ni, a ti a. Ramngaw leh nungchate humhalh chu Sawrkarin a ngai pawimawh tak zet a ni tiin Pi Lalzarmawii chuan National Board for Wildlife leh Wildlife Protection Act, 1972 hnuaia Sawrkar hmalakna hrang hrang kalkhawmte a hrilh a. Wildlife humhalh kawngah mipuite kan harh thar a tul takzet a ni tiin Lunglei DC chuan hemi kawnga chak taka hma la turin mipuite thawhho puiah a sawm.

He National Wildlife Week hawnna programme hi Pu C. Zairemthanga, Honorary Wildlife Warden, Lunglei District-in a kaihruai a.  Pu H. Lianmawia, IFS, Divisional Forest Officer, Lunglei-in Powerpoint Presentation hmangin zirtirna a pek bakah Pu Lalchawimawia, DLAO Lunglei chuan thu tawi a sawi a. Pi Lalhmangaihi Hrahsel, Principal, Lunglei Government College chuan lawmthu sawiin hun tawp a khar a ni.

He hunah hian Lunglei District chhunga kangmei ven kawnga VC hnathawk tha thlanchhuah 15 te hnenah Lunglei DC hian Citation leh pawisa fai Rs.2000/- theuh a hlan a. Special Award Category pawh siam niin nungchate humhalh kawnga hna thawk tha leh entawn tlak mi 3  - Pu Lalchhanhima Chongthu, Pu Lalthanzama Hauheng leh Pu K. Lalchhandama te hnenah Lunglei DC hian Citation a hlan bawk.