Vawiin khan Lok Sabha MP Pu C.L. Ruala kaihhruaina in Lunglei DC’s Conference Hall ah District Development Coordination and Monitoring Committee (DISHA) Lunglei District chu neih a ni. He committee ah hian DISHA Co Chairman Rajya Sabha MP Pu Ronald Sapa Tlau, Pu Chalrosanga MLA, Pi Lalzarmawii, IAS, Deputy Commissioner, Lunglei leh Sawrkar official te bak ah VC, YMAleh  MHIP aiawh  an tel a ni.

Pu C.L. Ruala chuan District tin a Department hrang hrang te hian kan ram hmasawnna in chelh a, chuvangin thahnemngai taka mahni hna theuh kan thawh hian kan ram in hmasawnna a pan dawn a ni, a ti a. Khawpui fai inelna ah Lunglei khawpui chu pahnihna a nih avang a a lawmpui thu a sawi a. Englai pawh a khawpui fai leh hrisel nih theih nan thangthar te kaihruai theuh turin kalkhawmte a chah a. Faina leh thianghlimna hian hriselna lamah nghawng thui tak a nei a tlang hri leng leh nau piang thi a tih tlem phah avangin ram thianghlim leh hrisel na kawng ah chak taka hmalak a tul a ni, a ti a.

Pu Ronald Sapa Tlau, Rajya Sabha MP, Co Chairman (DISAHA) ni bawk pawh in thu sawi in mahni hnathawhna kawng ah sulhnu tha tak hnutchhiah thei turin theihtawp chhuah turin Department hotute a chah a. Tlawmngai pawl pawh in ram siam kawng ah mawhphurhna pawimawh tak an nei a ni tiin tha thlah lova sawrkar hmalakna thlawp zel turin a chah a.

Pi Lalzarmawii, IAS, Deputy Commissioner, Lunglei pawh in thu sawiin Central Scheme khawihtu Department ten an hmalakna te 100% a puitlin theuh turin a chah a. Lunglei District ti hmasawn zel turin Sawrkar hnathawkte, tlawmngai pawlte leh khawtlang hruaituten mawhphurhna sang tak kan nei theuh a ni tiin Lunglei DC chuan tha zawka hna thawk zel turin kan rilru kan siam a tul a ni, a ti a.

Meeting ah hian kum 2017 – 2018 chhung khan MGNREGS  hnuai ah ni 39 inhlawhna siam niin September 2017 thleng a Lunglei District chhunga job card nei mi 35517 an awm tih tarlan a ni a. MGNREGS hnuai a hnathawh te hi Geo Tagging a kalpui a ni.  Individual House Hold Latrine hnuai a ekin sak tur 950 ah 690 sak zawh tawh a ni. Kawngpui dung ah km 82.23 thing phun a ni. PMAY-G hnuai ah in 333 sa tura ruahmanna siam mek niin PMKSY (WD) hnuai ah Project pahnih kalpui mek a ni. Kum 2016-2017 chhung in Lunglei District ah Nausen piang hlim thi 42 an awm a, Infant Mortality Rate chu 18/1000 a ni a, kumin April atanga September chhung in nau piang hlim thi 9 an awm a, IMR rate chi 9.2/1000 a ni. Hemi chhung hian nu nau chunga thihna pahnih a thleng a ni. Malaria vei hi 5.59% a ni a, Denque vei paruk hmuhchhuah a ni.

Swach Bharat Mission (Urban) hnuai ah YMA kaltlang in Individual Haouse Hold Latrine 10 sak zawh a ni. Tlabung Sub-Division ah IHHL hnuai ah chhungkaw 95 te hnen ah pawisa 1^st Installment pek an ni. Hnahthial Sub Division ah IHHL hnuai ah chhungkua 46 te hnen ah pawisa 1^st Installment pek an ni bawk.

Swachh Bharat Mission (Gramin) hnuai ah IHHL Lunglei block ah 1376 leh Hnahthial block ah 598 sak a ni. PMGSY hnuai ah kawng siam lai panga(5) nei in pakhat siam zawh a ni tawh. DDUGJY hnuai ah khaw pali ah eng pek tur kalpui mek a ni. Mid Day Meal hnuai ah Primary leh Middle School 552 ah naupang 28,739 ten Mid Day Meal an dawng. ICDS hnuai ah tar pension 5,268 te hnen ah pek an ni a, naupang kum 6 hnuai lam te tan nutrition pek an ni bawk. Telecom Department in optical fibre thlun mek ni in chak tak a kalpui mek a ni.