Vawiin chawhnu khan Lunglei District Anti-Tobacco Squad-te chu an Chairman Lunglei DC Dr Ankita Chakravarty, IAS hovin a office chamber-ah an thukhawm. Lunglei District huam chhunga Squad Drive kalpui zel dan tur te, Press Meet koh chungchang te, NEDP hnuaia Sawrkarin ruihtheihthil laka thalaite an fihlim theihna tura ruahmanna a siam “Project Himna – MADAT (Mizoram Against Drugs, Alcohol and Tobacco)” program Lungleia kalpui dan tur te leh hmalak tul dang hrang hrang an sawiho.  

District Anti-Tobacco Squad Chairman Dr Ankita Chakravarty chuan  zuk leh hmuam do kawngah nasa zawka tan kan lak a tul a ni tiin Anti-Tobacco Squad chu taima leh ngun lehzuala Lunglei District vil turin a chah a.  'HIMNA MADAT' chungchang pawh sawiin he hmalakna in a tum ber chu naupang class - V atanga class - VIII inkar ten vaihlo leh a kaihhnawih laka an fihlim theih nan kawng hrang hrang a zirtirna pek a ni. Kumin a HIMNA MADAT atan sawrkar in Lunglei District tan cheng nuai 10 pek a ni a, he sum hmang hian vaihlo leh a kaihhnawih bak ah ruihhlo chi hrang hrang ti lo tura inzirtir te, painting competition leh awareness programme hrang hrang buatsaih a nih tur thu a sawi. Vaihlo leh a kaihhnawih that loh zia kohhran hrang hrang ten an tlangaupui thin avangin lawmawm a ti a ni.

Project HIMNA-MADAT (Mizoram Against Drugs, Alcohol and Tobacco) hi New Economic Development Policy (NEDP) hnuaia Aizawl DC Pilot Project niin ruihtheih thil laka thalaite, abik takin Upper Primary chung lamte an hima an fihlim theihna tura ruahmanna a ni a. A project hmalakna zingah hian naupang zingah ruihtheihthil avanga an chunga thil thalo thleng thei hrang hrang inhrilhhriatna neih te, school-a Anti-Tobacco/Anti-Drug Abuse Club-te din te, Art competition buatsaih te, pamphlet, poster, sticker leh complaint board siam te, zirna in bulhnai a vaihhlo leh ruihtheihthil eng chi mah zawrh phallo tura hmalak te, Public Education campaign buatsaihte leh zirlaite hriatna tizau tura hospital tlawh programme siamte bakah zirlai nu leh pate zingah leh zirtirtute zinga vaihhlo nghei uar tura hmalak te a tel a ni.

Tun dinhmunah Lunglei khawpui chhunga school thlanchhuah 40-ah te ‘Awareness Campaign’ ngawrh taka kalpui mek a ni a. Zirlaite tan Painting, quiz leh debate competition pawh buatsaih thuai a ni ang. Hnahthial Sub Division leh Tlabung Sub Division ah te pawh he hmalakna hi kalpui thuai tum a ni.