Vawiin khan Lunglei DC Conference Hall-ah Tripura Bru Relief Camp  atanga Lunglei District a Bru chhungkaw 384 hruai kir dan tur ngaituahin District Level Core Committee an thukhawm. Thutkhawmna ah hian Lunglei DC Dr. Ankita Chakravarty, Lunglei SP Pu C. Lalthanmawia leh Home Department Deputy Secretary Pu R. Lalthanzuala te bakah a kaihhnawih sawrkar Department hotute leh Sub Hqrs YMA hruaitute an tel.

Sawrkar laipui, Mizoram Sawrkar, Tripura Sawrkar leh Mizoram Bru Displaced Peoples Forum te chuan Draft Agreement an siam angin August ni 14, 2018 atanga September ni 10, 2018 chhungin Tripura Relief Camp paruk (6) atangin Bru chhungkaw 5407 (mi 32,876) laklet tur an ni a, hengte hi Mizoram a District Pathum- Lunglei (chhungkaw 384), Kolasib (chhungkaw 824) leh Mamit (chhungkaw 4199) ah hruai kir tur an ni. Hruaikir hna thawk tur hian LO leh AO engemawzat ruat an ni. Lunglei District ah hian Bru chhungkaw 384 hruaikir tur niin Khakchangpara camp atangin chhungkaw 4, Hamsapara Camp atangin chhungkaw 1, Naisingpara Camp atangin chhungkaw 63 leh Hazacherra camp atangin chhungkaw 316 an ni. Heng chhungkaw 384 te hi Lunglei District huam chhunga khaw pali- Putlungasih, Chawilung S, Dinthar leh Buknuam ah hruaikir an ni ang. Vawiin meeting-ah hian Relief Camp atanga Lunglei District an rawn pan kawnga motor ruahman dan tur, an ei leh in tur, tui in tur, inthiarna leh Medical facilities leh security arrangement te chipchiar taka sawiho a ni a. Department hrang hrangte sum mawmawh te, kawng dinhmun, kawlphetha dinhmun, damdawi leh medical facility dang mamawh tur te, buhfai lama ruahmanna siam te leh Sawrkar official-te duty dan tur sawiho a ni bawk.  Lunglei DC Dr. Ankita Chakravarty chuan Bru hruai kir hna hi Mizoram sawrkar Home Department –in Road Map a buatsaih angin uluk taka kalpui a nih tur thu sawiin he hna hi hlawhtling taka zawhfel a nih theihnan kalkhawmte te chu theihtawp chhuah theuh turin a chah a.

Bru chhungkua rawn let te hi Mizorama an rawn let thla ah One time Financial Assistance cheng nuai 4 chu chhungkaw lu ber hmingin Fixed Deposit in kum 2 chhung dah ani anga, Mizoram a kum 3 an chen hnuah pekchhuah chauh tur an ni. Hemi bakah hian kum 2 chhung a tan thlatin cheng 5000/- tanpuina pek an ni ang (DBT kaltlangin) ,Ration chu kum 2 chhung a tan a thlawna pek an ni bawk ang. Sawrkar atangin insak tanpuina 1,50,000/- an dawn tur chu Direct Benefit Transfer (DBT) kaltlangin chhawng thuma pek tur an ni a, an rawn let tirh in chhungkaw tin chu cheng 25,000/- theuh pek an ni anga, an chenna tur in chu za a sawmnga an sak zawh hunah  (50% completion of House Construction) cheng 50,000/- pek an ni anga, in an sak zawh hunah cheng 75,000/- theuh pek leh an ni ang. Mizoram Sawrkar hmalaknain hruaikir tur an ni anga, a hruai kirna senso (cost of transportation) hi Ministry of Home Affairs in Mizoram Sawrkar hnenah a pe dawn a ni.