Vawiin chawhnu khan Lunglei District Sports Committee (LDSC) Office, Electric Veng, Lunglei (District Sports & Youth Services Office hnuai) chu Pi C.Lalremruati, MIS, DIPRO Lunglei chuan a hawng.

Hawnna inkhawm Pu KT. Nghawra, Chairman, LDSC kaihhruaiah Pi C.Lalremruati chuan LDSC-in office thar changtlung tak an nei chu a lawmpui thu sawiin Lunglei District tan hun chhinchhiah tlak tak a ni, a ti a.  Mizoram sawrkarin District khawpui leh thingtlang khaw hrang hrangah sports infrastructure te siamin India ram chauh pawh ni lo, khawvel huapa Mizo infiammiten dinhmun tha an luah theih nan nasa takin tan a la a ni, a ti a. Hmasawnna tur chu la tam hle mahse tun hnai kum rei vak lova hma kan sawn nasatzia thlir hian Mizote hian sports ah talent kan nei tha hle a ni tiin a ti tak tak peih tan chuan hlawhtlinna a awm tih a lang chiang hle a ni, a ti a. Lunglei District in sports lama hma kan sawn zel theih nan LDSC chu an pawimawh takzet a ni tiin Sports Association hrang hrang te chu thawhhona tha tak nen hma la chhunzawm zel turin a chah a. India ram pumah faina beihpui thlak a nih mek laiin LDSC office thar chu faina kawngah pawh entawn tlak an nih ngei theihnan duhsakna a hlan nghawl bawk.

Pu C.Lalremsanga, DS&YO, Lunglei pawhin thu sawiin Sports lam a hma kan sawn theih nan leh LDSC nen a thawhhona a that zawk theih nan Directorate Of Sports & Youth Services chuan DS&YO Office hnuai chu LDSC Office atan hman a phalsak a, Sports Association hrang hrang khaikhawmtu chu DS&YO leh LDSC te an ni a, infiamna lam a hma kan sawn zawk theih nan thawhhona tha tak nen a thalaite kan kalpui a pawimawh a ni a ti.

Pu Lalramsanga Colney, Secretary, LDSC in report pein Vice Chairman Pu KC Lalruatkima’n lawmthu sawiin hun a khar a ni.