Vawiin khan Lunglei DC Dr Ankita Chakravarty, IAS kaihhruaina hnuaiah Lunglei khawpui tana City Level Executive Committee on Deendayal Antyodaya Yojana – National Urban Livelihoods Mission (DAY-NULM) an thukhawm.

Dr Ankita Chakravarty chuan National Urban Livelihoods Mission chu sawrkar laipui Flagship Program pawimawh ber pakhat a nih thu sawiin he mission-in a tum ber chu Self Help Group kaltlanga khawpuia retheihna tih tlem a, chhungkaw harsa zawkte tana eizawnna ngelnghet ngaihtuah sak a ni, a ti a. Ram hmasawn zelna turin mirethei leh harsa zawkte dinhmun kan chawikan a tul a ni tiin DUDO, UD&PA Department Lunglei kaihhruaina hnuaia he scheme hi Lunglei khawpuiah chak taka kalpui a ni chu lawmawm a tih thu a tarlang a. DAY-NULM tangkai taka hman a nih zel theihnan Committee member-te theihtawp chhuah turin a chah bawk.

Meeting-ah hian Lunglei DUDO leh Member-Secretary ni bawk Pu Andrew Lalhruaia chuan NULM hnuaia Lunglei Town Area chhunga an hmalakna report a pe a. NULM component paruk zinga Shelter for Urban Homeless (SUH) hnuaiah Lunglei leh a chhehvela Home pariat te hnenah tanpuina pek niin mi 50 awm theihna hmeichhe chanhaite awmna tur Women Shelter chu Chanmari Lungleiah sak mek a nih thu a sawi a. Social Mobilisation & Institutional Development (SM & ID) hnuaiah Self Help Group (SHG) 137 enkawl mek niin, Support to Urban Street Vendors (SUSV) hnuaiah vending zone sawm pasarih (17), restricted vending zone leh no vending zone turte an enfiah vek tawh thu a tarlang a. Self-Employment Programme (SEP) hnuaiah mi 125 hnenah mimal loan pek niin Group Loan 13 pek chhuah tawh a ni a., Employment through Skill Training & Placement (ST&P) hnuaiah mi 803 hnenah thiam thil (skill) training, heng training chhuakte thiamna endikna (assessment) kalpui leh mek a nih thu a tarlang a ni.

Vawiin meeting-ah hian Lunglei town area-a Vending zone siam dan tur te, Self-Employment Programme (SEP) hnuaia loan dil te thalnchhuah dan tur te, Cooperative Society hnuaia Area Level Federation register dan tur leh hmachhawp dang te sawiho a ni.