Vawiin khan Lunglei District hnuaia Polling Station 191-a duty tur Presiding Officer (PRO) leh Assistant Presiding Officer (APRO) te tan thil pawimawh inhrilhfiahna hun ‘final briefing’ Saikuti Hall-ah Lunglei DEO & DC Pi K. Lalrinzuali hova neih a ni. He hunah hian Lunglei Additional DC Pu Benjamin Lalzama, Project Director Pu K. Lalrohlua leh election kaihhnawih official dangte an tel.

Lunglei DC Pi K. Lalrinzuali chuan Lok Sabha Election 2019 felfai leh muanawm tak a awm theihna tura thil pawimawhte kalkhawmte sawipuiin Presiding Officer (PRO) leh Assistant Presiding Officer (APRO) te mawhphurna a san zia leh an hna a pawimawh zia hre thar turin a chah a. District Level Master Trainer (DLMT) ten vawi engemawzat uluk taka training an neihpui chu hmang tangkai ngei tur leh an mawhphurna hlenchhuah kawnga harsatna a neih apiangte a rang thei ang bera report vat thin turin a chah a. General Election hi kan ram Democracy hlawhtlinna lungphum pawimawh tak a ni tiin Lunglei DC chuan kalkhawmte chu an duty thahnemngai taka thawk tur leh rirlru ti danglam thei thil laka fihlim vek turin a chah bawk. Inthlanna inpuahchah na a that thu sawiin Lunglei District chu Voter Turnout sanna ber leh District dangte tana entawn tlak a nih theihnan tan la theuh turin kalkhawmte a sawm a ni. Inthlanna hmanrua EVM leh VVPAT te chu khawl thil chhe thei an nih avangin uluk tak leh fimkhur taka enkawl turin PRO leh APRO te chu a chah bawk.

Vawiin program hi Lunglei Election Officer Pu James Lalnithanga’n kaihruaiin Additional DC Pu Benjamin Lalzama, Project Director Pu K. Lalrohlua leh SDO (S) Pu Lalnundika ten election chungchang thil pawimawh sawina hun an hmang bawk.