Vawiin chawhnu khan Lunglei DC Pi Lalzarmawii, IAS hovin a pisaah Lunglei District chhunga Bank Manager hrang hrang te nen, cheng 500 leh 1000 note tihthih chungchanga Lunglei dinhmun an sawiho.

Pi Lalzarmawii chuan December ni 30, 2016 thlenga pawisa note a thleng theih avangin mipuite harsat loh nan dawrkai te pawhin cheng 500 leh 1000 note dawng hreh lo tura a duh thu sawi a. Bank hotute chu mipui harsatna sukiang turin theihtawp chhuah tlang turin a ngen a ni. Harsatna tawk an awm chuan DC office hrilhhreh lo turin a chah a ni.

Bank manager te pawhin pawisa an kawl dan leh ATM dinhmun te an tarlang a. Bank thenkhata pawisa thleng tur tlem an la neih laiin, bank thenkhat chuan an neih tawh loh thu an sawi a, pawisa note awm loh avangin ATM pawh khar a tul phah thu an sawi a ni. Mipuiten harsatna siam lova dawhthei taka bank an dawr thing avangin lawmthu an sawi a, mahse pawisa lem te a awm leh zeuh thin avangin mipuite fimkhur turin an duh a, pawisa lem impound a nih pawhin mipuite hriatthiamna an ngen a ni. Pawisa note lem pali aia tam man a nih chuan FIR thehluh a ngaih thu an sawi bawk.

Heng harsatna hrang hrang avang hian mipuite digital platform – netbanking leh mobile banking te uar zawka hmang turin an duh thu an sawi a, pawisa chhiarna khawl in pawisa thai ran reng reng pawisa lem anga a ngaih dawn avangin mipuite pawisa thai rang lo hram turin an ngen bawk a ni. Bank aiawh in SBI, MRB, APEX, HDFC, Axis, IDBI leh Canara Bank Manager te an tel a ni.