Cultural Heritage Centre, Lungleiah vawiin chawhma khan LE & IT Department leh International Labour Organisation (ILO) bultumin ni khat awh ‘Workshop cum stakeholders’ consultation on Mizoram State Skill Development & Entrepreneurship Promotion Policy’ neih a ni a. Pu Benjamina, Commissioner & Secretary, LE & IT department chuan a kaihruai a ni.

Pu Benjamina chuan kan ramah hna thawh tur awm leh kan thiam thil (skill) neih te a in mil loh thin avangin a kar a zau telh telh a, a inkar inchuktuah rem hi he skill entrepreneurship policy in a tum chu a ni, a ti a. Zirlaiten an hun leh sum sengin degree nei turin lehkha an zir a, an thiamna leh hna awm a in mil leh loh thin avangin a hranpa a vocational training leh an ngai a, hun hlu tak an khawhral phah a ni, a ti. Thalai hna zawng mek te eizawnna kawhhmuh hi he policy tum chu a ni, a ti a. Kan rilru sukthlek kan thlak a, kuthnathawh kan chawisan thiam a tul a, hnathawh loh hi a zahthlak a ni tih kan hriat thar a ngai, a ti. Kuthnathawh hi kan chawisan thiam chuan, degree ka neih loh chuan hna ka hmu lo ang tihna thinlung a bo anga, degree neih kan ngaihsan erawh chuan kan ram a ding chhuak dawn lo a ni, a ti.

Pu Shivaji Gupta Roy, DEFT, ILO Consultant chuan presentation hmangin ‘Mizoram State Skill Development & Entrepreneurship Promotion Policy’ sawi zauna a nei a. New Economic Development Policy nena an inkungkaihna lai te a sawi a ni. Mizoram chu India rama hetiang skill gap study nei hmasa ber a ni tiin, state dang te pawhin Mizoram hnung zui in study an kalpui mek thu a sawi bawk.

Pi C. Lalnuntluangi, NUNV-Admin & Management Associate, ILO, Mizoram in keynote address sawiin, September-December 2015 khan Aizawl District tan skill gap study neih a nih hnu in, District dang zawng zawng leh Autonomous District Council ah te kumin June leh August chhung khan zirchianna neih a nih thu a sawi a. Department hrang hrang te pawh National Skills Qualification Framework (NSQF) in a phut anga kan inher rem ve hret hret a ngai a ni, a ti.

Workshop ah hian zawhna leh chhanna hun hlawk thlak tak hman a ni a, LE & IT Director Pu Lalhmachhuana’n lawmthu sawina in a khar a ni.