Tripura Transit camp paruk a Reang ( Bru) Mizoram khua leh tui dik tak an nih leh nih loh enfiah hna Identification neih mek chu thawh chhunzawm zel niin vawiin atang hian heng camp zinga mihring tamna ber Naisingpara camp ah enfiah hna hi thawh tan leh a ni.

Naisingpara camp-a endik hna thawh hi Pi Lalbiaksangi District Bawrhsap Mamit chuan a hmunah kalchilhin vawiin hian a telpui a, North Tripura DM pawhin a telpui bawk.

Tarlan tawh angin Reang (Bru) Mizoram mi an nih leh nih endik nan hian 1995 rolls chu hman a ni a, enfiah hna hi uluk takin Mizoram atanga Identification team te chuan an camp theuha kalchilhin an nei thin a ni.

Vawiina Naisingpara camp atanga endik te hi Mamit District atangin chhungkaw 220 an ni a, puitling 965 niin naupang 363 an ni. Kolasib District atanga endik hi chhungkaw 34 an ni a, puitling 137 niin naupang 60 an ni. Lunglei District atangin Chhungkaw 23 endik niin hetah hian puitling 108 leh naupang 42 an ni.