Urban Development & Poverty Alleviation (UD&PA) Department chu Mizorama e-Office hmang hmasa ber ni turin vawiin khan an Minister Pu Zodintluanga chuan a pisa-ah a tlangzarh. e-Office hmang thei tur hian UD&PA Department chu National Informatics Centre (NIC) leh Information & Communication Technology (ICT)department-te nen thawk hovin, vawiin atang hian UD&PA Secretariat leh Directorate Office chu lehkhapuan hmang tawh lovin, internet kaltlangin hna an thawk tawh dawn a ni. 

Minister Pu Zodintluanga chuan UD&PA Department-ah e-office hman a ni thei ta chu Mizoram Sorkar tan mel lung pawimawh tak anih reng tawh tur thu a sawi a. UD&PA Minister chuan e-Office hian sorkar office kalphung chu nasa lehzualin a tichak in a langtlang phah tur thu a sawi a. Dawhkan pakhat atanga dawhkan danga file put kual ngai tawh lovin computer hmangin awlsam takin thawn kual ni tawhin, data leh hriattur pawimawh reng reng file hai chiam ngai lovin awlsam taka hmehchhuah mai theihin a awm reng tawh tur thu te, thil tih fuh zan lo awmte thup bo tum a note-sheet thar siam chawp leh file back-date thin te chu a theih loh tur thu tarlangin, e-Office vangin Sorkarin hun, tha leh sum tam tak a hum phah dawn a ni, a ti a. Internet kaltlanga file lutchhuak reng reng chu khawih anih tawh dawn avangin a file chang mektu chu office-ah awmlo mahse internet khawih theihna hmunah a awm chuan hna a thawh reng theih tur thu sawiin, hei hian sorkar hna kallai a tih chak mai bakah a dawrtu mipui tan pawh awlsamna a siamsak dawn a ni, a ti a. Department dang pawhin UD&PA Department hnung zuia e-Office kalpui tura hma an lak ve a beisei thu a tarlang bawk. 

E-Office tlangzarhna hun hi UD&PA Secretary Dr. C. Vanlalramsanga chuan kaihruaiin, e-Office chu India Sorkarin Digital India a kalpui mek tichak tura scheme tangkai tak anih thu a sawi a. Pu C. Lalhmachhuana, Secretary I&CT pawhin e-office hlawhtlin nana UD&PA nena thawhhona te tarlangin thu a sawi a. UD&PA Joint Director (A), Pu James Lalnunmawia chuan e-Office hmang tura Department hmalakna tlangpui sawiin, NIC leh I&CT nen thawhdun dan te, New Delhi atanga NIC mithiam ten hma an lakpui dan leh UD&PA Department hnuaia thawktute NIC -Delhi atanga training an pek thu te a tarlang bawk a. Pu Chandan Babu, Team Leader, NIC Delhi e-Office Project Division chuan a kalphung tlangpui PowerPoint hmangin presentation pe in, hun hi Pu Vanlalmawia, UD&PA Joint Secretary chuan lawmthu sawiin a khar a ni. Vawiin e-Office hawnna hunah hian UD&PA Directorate leh Secretariat thawktute, I&CT Department leh NIC hotute bakah thuthar lakhawmtute an tel a ni. 

UD&PA Secretariat atangin e-Office hmangtu tur staff leh officer hi 15 niin, Directorate ah 76, a vaiin mi 91 an awm a. April, 2016 khan UD&PA Department leh ICT Department chu e-Ofice Pilot Project atan ruahmanna siam anih hnu in August thlaah kalpui nana bungrua hrang hrang mamawhte lakkhawm tan a ni a. Minister hovin harsatna leh mamawh hrang hrangte sawi a meeting neih thin niin, October ni 3, 2016 khan eLite Software leh a kentel dangte leina tur Rs. 14.766 lakhs chu NICSI, New Delhi hnenah ICT Department kaltlanga pek a ni. 

e-Office hi Information Technology hmanga Sorkar hnathawh dan phung hlawk zawk leh sawt zawka thawh theihna tura duan a ni a. NIC hian e-Office hi version pali siamin, tuna Tuna UD&PA Department in a hman tur hieOffice(Lite) ani a. Hemi hian hmangtu (user) 250 thleng a support thei a, component pali awm zingah tunah hian a bul tan nan File Management System, office tina file kal dan phung pangngai Manual of Office Procedure dungzuia siam chu hman hmasak a ni ang a. Component dang - Personnel Information Management System (thawktute personal file vawn that), Knowledge Management System (office document hrang hrang dah that a, chhinchhiah a, mumal taka thliar hran) leh Collaboration and Messaging System te chu a remchan dana hman belh zel tura ruahmanna siam a ni. File Management System hnuaiah hian lehkha/dak lo lut reng reng chu diarist-ten computer ah an scan lut ang a. Chuta tang chuan a kalna tur officer/staff tinah a hotu lu ber thlengin e-mail hmangin an e-Office account-ah thawn an ni ang a., approved/ pawm anih hnu ah e-mail hmang bawka thawn thlak leh niin, approved copy chu print out chauh ani ang. Internet a down changa wireless hmanga thawh theih dan hmalak mek ani bawk. State Data Centre (SDC) hmang tangkaiin Directorate office-a dawhkan tin te leh Secretariat office an inthlunzawm ang a. File kal reng reng lehkha a chhutchhuah a, peon te ken kual ngai lovin e-file hmangin computer-ah lehkha te hi an inthawn zung zung tawh zawk dawn a, thu pawimawh vawn (confidentiality) ah pawh nasa takin a pui dawn a ni.